Hundar, svín og hrossasmetti: Trump hefur lengi hæðst að konum fyrir útlit þeirra og líkamsstarfsemi

Donald Trump, forseti Bandaríkjanna, kallaði klámleikkonuna Stephanie Clifford (Stormy Daniels) hrossasmetti í gær. Hann hefur lengi talað með niðrandi hætti um útlit kvenna og líkamsstarfsemi þeirra. Þar að auki hefur hann ítrekað líkt konum við dýr.

Nú í gær fagnaði forsetinn því á Twitter að dómari hefði vísað frá máli Clofford gegn Trump. Sagðist hann nú geta höfðað eigin mál gegn henni og með smávægilegri innsláttarvillu virtist hann kalla sjálfan sig svikahrapp.

Sjá einnig: Forseti Bandaríkjanna kallar klámleikkonu hrossasmetti



Clifford hefur haldið því fram að hún hafi sofið hjá Trump árið 2006, þegar yngsti sonur hans var tiltölulega ný fæddur. Trump neitar því en greiddi henni þó 130 þúsund dali í aðdraganda kosninganna til að koma í veg fyrir að hún segði sögu sína.

Munu ekki hjálpa

Ummæli Trump í gær þykja ekki til þess búin að hjálpa Repúblikanaflokknum í aðdraganda þingkosninganna í næsta mánuði. Flokkurinn hefur þegar átt erfitt með að ná til kvenna.

Sífellt færri bandarískar konur skilgreina sig sem Repúblikana og fækkunin staðið yfir um nokkuð skeið. Hins vegar virðist sem að hægur straumur hafi orðið að flóði í forsetatíð Donald Trump. Vinsældir Trump meðal kvenna eru í sögulegu lágmarki forseta Bandaríkjanna þar sem 63 prósent kvenna segjast ósáttar með hann.

Sjá einnig: Konur fjarlægjast Repúblikanaflokkinn



Meðal annars hefur Trump kallað konur feitar og ljótar. Hann sagði að ein kona væri „geðsjúk, grenjandi úrhrak“ og að ein væri hundur með andlit svíns. Eftir kappræður við Hillary Clinton árið 2015 sagði hann að klósettferð hennar væri „of ógeðsleg til að tala um“ og svo má lengi telja.

Hér að neðan verður stiklað á stóru yfir nokkur dæmi þar sem Trump hæðist að konum vegna útlits þeirra og líkamsstarfsemi.

„Getið þið ímyndað ykkur þetta andlit á næsta forseta okkar?“ sagði Trump eitt sinn um Carly Fiorina, mótframbjóðanda hans innan Repúblikanaflokksins. „Ég meina, hún er kona og ég á víst ekki að segja slæma hluti, en í alvörunni fólk, látið ekki svona. Er okkur alvara?“

Seinna meir þrætti hann fyrir að hafa verið að tala um útlit Fiorina og sagðist hafa verið að tala um persónuleika hennar.

Hér má sjá stutta samantekt NBC um ummæli Trump um konur.

Sama ár, eftir aðrar kappræður sem sjónvarpskonan Megyn Kelly stýrði, sagði Trump að erfiðar spurningar hennar til hans gætu verið útskýrðar með því að hún væri á túr. Seinna sagði Trump að hann gæti séð blóð koma „út úr augum hennar, blóð koma út úr … hverju sem er.“

Í kosningabaráttunni birti hann einnig slæma mynd af eiginkonu Ted Cruz, mótframbjóðanda hans, við hlið myndar af Melaniu Trump með textanum: „Myndir eru á við þúsund orð“.

Trump stóð lengi í deilum við leikkonuna Rosie O‘Donnell og sagði hann meðal annars að hún hefði „ljótt, feitt andlit“.

Árið 1992 var vitnað í Trump í New York Magazine þar sem hann var að tala um Katarina Witt, sem er þýsk íþróttakona sem keppti á skautum. Hann sagði að hún gæti eingöngu verið talin myndarleg ef „þér líkar konur með slæma húð og eru byggðar eins og línuverðir.“

Eftir að Jessica Leeds steig fram árið 2016 og sakaði Trump um að hafa káfað á sér í flugvél á níunda áratugnum, sagði Trump að hún myndi aldrei verða fyrsti kostur hans. Þegar önnur kona sakaði hann um að hafa veist að sér með kynferðislegum hætti sagðist hann aldrei hafa gert það.

„Skoðið Facebooksíðu hennar og þá vitið þið af hverju,“ sagði Trump.

Kallað eftir aga

Þá hefur hann margsinnis sagt að Arianna Huffington, stofnandi Huffington Post, sé „ljót, bæði að innan og utan“.

Trump hefur talað áfram um konur með þessu hætti, eftir að hann settist að í Hvíta húsinu. Í fyrra sagði hann sjónvarpskonuna Miku Brzezinski vera heimska og sagði að hann hefði hitt hana um áramótin og þá hefði blætt mikið úr andliti hennar vegna andlitslyftingar.

Svo kallaði hann Clifford „hrossasmetti“ eins og fram hefur komið áður.

Ummæli sem þessi eru, eins og áður segir, ekki til þess fallin að hjálpa Repúblikönum í komandi kosningum. New York Times segir hátt settan meðlim flokksins hafa biðlað til forsetans að hætta að tala um útlit kvenna. Nauðsyn sé á aga innan Hvíta hússins næstu tuttugu dagana.