Salah fór meiddur af velli í sigri Egyptalands

Mohamed Salah fór meiddur af velli í leik Egypta og Svaslendinga í undankeppni Afríkubikarsins í gærkvöld.

Salah skoraði eitt af fjórum mörkum Egyptalands í leiknum upp úr hornspyrnu. Framherjinn hefur lítið skorað það sem af er tímabili en fann marknetið í þessum leik.

Salah þurfti svo að fara af leikvelli í uppbótartíma vegna meiðsla.

„Frumgreining læknateymisins er sú að Salah meiddist á vöðva,“ sagði aðstoðarþjálfari egypska landsliðsins Hany Ramzy.

„Hann mun fara í frekari skoðanir en mitt mat er að þetta sé ekki alvarlegt.“

Egyptaland á annan leik við Svasíland á þriðjudag. Næsti leikur Liverpool er útileikur við Huddersfield laugardaginn 20. október.