Líkur Ís­lands á verð­launum hafa snar­aukist

Dr. Peter O‘Donoghue, prófessor við íþróttafræðideild Háskólans í Reykjavík, kynnti uppfært spálíkan sitt í dag í beinni útsendingu sem sjá mátti á Vísi. Upptöku má sjá neðst í greininni.

Úrslitin úr riðlakeppninni á EM, og úr fyrstu leikjum milliriðils I, hafa nú verið tekin inn í spálíkanið og eftir 100.000 keyrslur er niðurstaðan sú að Danmörk sé nú líklegast til þess að landa heimsmeistaratitlinum, með 22% sigurlíkur, þrátt fyrir tapið óvænta gegn Portúgal. Liðið er þó bara örlítið líklegra en Frakkland (21%).

Líkanið spáir því að lokastaðan á EM verði þessi:

1. Danmörk
2. Frakkland
3. Svíþjóð
4. Slóvenía
5. Þýskaland
6. Ísland
7. Ungverjaland
8. Portúgal

Það þykir því líklegast að Svíþjóð og Slóvenía verði þau tvö lið sem komast áfram upp úr milliriðli Íslands, en strákarnir okkar þykja ekki langt undan.

Áður var Íslandi raðað í 8. sæti og talið að Svíþjóð og Ungverjaland færu upp úr milliriðlinum í undanúrslit.

Ekki miklar líkur á titlinum

Taldar eru 3,3% líkur á að Ísland verði Evrópumeistari, 8% líkur á silfri og 28,3% líkur á að liðið komist í undanúrslit en tapi þar og spili um brons.

Þá eru taldar 24,3% líkur á að Ísland spili um 5. sæti en 20,1% líkur á að liðið endi í 7. eða 8. sæti og 12,8% líkur á 9. eða 10. sæti. Loks eru aðeins 3,3% líkur á að liðið endi í 11. eða 12. sæti og ljóst er að liðið getur ekki endað neðar.

Áður voru taldar 1,7% líkur á að Ísland ynni EM en 4% líkur á 2. sæti og 14,2% líkur á að liðið myndi spila um bronsverðlaunin.

Strákarnir okkar hafa unnið alla þrjá leiki sína á mótinu til þessa, tóku tvö stig með sér í milliriðil og spila nú þýðingarmikinn leik gegn Króötum Dags Sigurðssonar klukkan hálf þrjú í dag. 

Í HR-stofunni í dag, sem sjá má hér að neðan, ræddu Kristján Halldórsson, kennari við íþróttafræðideild HR, Patrekur Jóhannesson, fyrrverandi landsliðsmaður í handbolta, og Arnar Pétursson, landsliðsþjálfari kvenna í handbolta, málin og fóru yfir spálíkanið.

Þá bættist í hópinn Chris (Christopher Ian Curtis) dósent við íþróttafræðideild sem hefur starfað bæði í fræðasamfélaginu í um áratug og innan íþróttaheimsins síðustu 15 ár og sérhæft sig þar í næringarfræði íþróttafólks. Hann fjallaði um mikilvægi næringar fyrir íþróttafólk þegar leikið er svona þétt.

Upptöku frá HR-stofunni má finna hér fyrir neðan: