Labbaði með leikfangabyssur inn á Old Trafford

Manchester United endurskoðar öryggisreglur á Old Trafford þessa dagana eftir að upp komst að tveimur leikfangabyssum hefði verið smyglað inn á leikvanginn.

Stuðningsmaður hljóp inn á völlinn snemma í leik United og Juventus í Meistaradeild Evrópu á dögunum. Öryggisverðir náðu að fanga stuðningsmanninn og koma honum af vellinum. Eftir það fóru þeir og skoðuðu sæti stuðningsmannsins og fundu þar tvær leikfangabyssur.

„Að fara með leikfangabyssur úr plasti inn á völlinn er augljóslega mjög óábyrg hegðun,“ sagði talsmaður United.

„Sem betur fer slasaðist enginn í þetta skipti, en þar sem öryggi stuðningsmanna og starfsfólks er í algjörum forgangi hjá Manchester United setti félagið strax af stað rannsókn á aðstæðum.“

„Hún felur í sér endurskoðun á öllum öryggisreglum.“

Eftir umræddan leik hlupu tveir stuðningsmenn til viðbótar inn á völlinn. Manchester United á yfir höfði sér refsingu fyrir þessa hegðun stuðningsmannanna, aganefnd UEFA tekur málið fyrir í lok mánaðarins.