„Mig kitlar svaka­lega í puttana“

Þorsteinn Leó hefur verið með íslenska hópnum allt mótið en æft lítið vegna nárameiðsla sem hafa plagað hann síðustu vikur. Vonir standa til þess að hann geti tekið þátt á síðari hluta mótsins.

Hann segir gott að koma yfir til Malmö frá Kristianstad.

„Þetta er fínasti staður hérna. Þetta er held ég stærsta hótel sem ég hef verið á, 20 hæðir eða eitthvað,“ segir Þorsteinn sem er á batavegi.

„Mér líður þokkalega. Þetta er á síðustu metrunum að verða heill. Mér líður mjög vel og verð heill, vonandi sem fyrst,“ segir Þorsteinn.

Hann tók þá fullan þátt í æfingu dagsins, í fyrsta sinn í ferðinni.

„Í dag var ég með í öllu. Vörn, sókn og allt. Æfingin var kannski ekki á háu tempoi en ég er kominn í allt saman og reyni að vera klár,“ segir Þorsteinn sem gat vart sofið vegna spennu fyrir æfingunni.

„Í gær og nótt var það: „Djöfull er ég spenntur að fara á æfingu á morgun“. Ég hef ekki verið á hópæfingu í níu eða tíu vikur. Þetta var geðveikt.“

Þorsteinn segir þá upplifunina hafa verið sérstaka, að vera hluti af liðinu en samt ekki. Enda hefur hann ekki æft almennilega fyrr en í dag.

„Þetta er mjög skrýtið. Maður er með liðinu allan daginn en ert ekki að spila og ekki á æfingum heldur mikið einn í þínu. Ég hef aldrei gert þetta áður. Þetta er nýtt fyrir mér að vera meiddur og hvað þá meiddur svona lengi,“ segir Þorsteinn sem segir liðið klárt í framhaldið.

„Andinn er mjög góður. Það eru allir hressir og ferskir og við mætum góðir í milliriðilinn.“

Þá hlakkar hann sérlega mikið til að snúa aftur á völlinn.

„Mig kitlar svakalega í puttana að komast á völlinn aftur. Vonandi sem fyrst,“ segir Þorsteinn léttur.

Viðtalið má sjá í spilararnum.