Meiðsli De Bruyne skoðuð í dag

Hnémeiðsli belgíska miðjumannsins Kevin De Bruyne verða skoðuð í dag en þessi mikilvægi leikmaður Man City haltraði af velli í 2-0 sigri á Fulham í enska deildabikarnum í gærkvöldi.

De Bruyne er nýkominn til baka eftir hnémeiðsli og því mikið áfall fyrir stuðningsmenn City að sjá hann þurfa að fara af velli í gær.

Hann meiddist hins vegar á vinstra hné en það var hægri fóturinn sem hélt honum frá vellinum í 10 leikjum fyrr á tímabilinu.

„Við vitum ekki hvort þetta var smávægilegt eða alvarleg meiðsli. Vonandi er þetta ekki mjög alvarlegt,“ sagði Pep Guardiola, stjóri Man City, í leikslok.

Man City fær Southampton í heimsókn í ensku úrvalsdeildinni um helgina og má reikna með því að De Bruyne verði fjarri góðu gamni.