Sitja fastir í vélum vegna veðurs á Keflavíkurflugvelli

Farþegar sitja fastir í sjö farþegaþotum á Keflavíkurflugvelli vegna veðurs. Verklagsreglur á Keflavíkurflugvelli eru þannig að ef vindhraði fer yfir 50 hnúta, eða 25,7 metra á sekúndu, þá er ekki hægt að nota landganga til að flytja farþega úr farþegaþotum og inn í flugstöðina. 

Þess í stað þurfa farþegar þessara sjö véla að  bíða rólegir þangað til veðrið gengur niður. Um er að ræða sex farþegaþotur frá flugfélögunum EasyJet, Wizz Air og Finnair, auk einnar vélar með áhöfn. 

Eru dæmi um að farþegar hafi beðið í vélunum í um 90 mínútur. 

Um klukkan átta í kvöld var meðalvindhraði á Keflavíkurflugvelli um 20 metrar á sekúndu en öflugasta hviðan náði 31 metra á sekúndu. Búist er við að veðrið gangi niður um níu leytið.