Arnautovic með nýjan samning við West Ham

Marko Arnautovic hefur framlengt samning sinn við West Ham um eitt ár eða til ársins 2023, aðeins nokkrum dögum eftir að hann óskaði eftir að fá að yfirgefa félagið til þess að fara til Kína.

Þessi 29 ára gamli Austurríkismaður hefur ekki verið í leikmannahópi West Ham í undanförnum leikjum vegna þessa en nú leikur skyndilega allt í lyndi og verður hann væntanlega mættur í framlínu liðsins í næsta leik.

„Ég elska þetta félag og ég mun alltaf gera það, sama hvað. Ég er hér og er tilbúinn að láta að mér kveða. Ég vona að stuðningsmennirnir séu það líka og við byrjum upp á nýtt,“ sagði Arnautovic en hann eyddi drjúgum tíma eftir síðasta leik sem hann spilaði fyrir West Ham til að þakka stuðningsmönnum fyrir og leit allt út fyrir að hann væri að kveðja félagið.

Arnautovic hefur skorað 19 mörk í 53 leikjum fyrir West Ham síðan hann gekk í raðir félagsins frá Stoke City sumarið 2017.

A message from Marko Arnautovic to the fans: pic.twitter.com/QgLFhMuynm

— West Ham United (@WestHamUtd) January 26, 2019