Kvöldfréttir Stöðvar 2 í beinni útsendingu

Lögreglan á Suðurnesjum lagði hald á fjórfalt minna af hörðum fíkniefnum á síðasta ári samanborið við árið 2017. Á sama tíma hefur neysla slíkra efna aukist. Óttast er að talsvert fleiri burðardýr komist óáreitt inn í landið. Rætt verður við rannsóknarlögreglumann hjá lögreglunni á Suðurnesjum í kvöldfréttum Stöðvar 2 á eftir sem segir málið mikið áhyggjuefni.

Alþingi kom saman eftir jólaleyfi í dag en forseti þingsins segir það hafið yfir allan vafa að þinginu sé heimilt að skipa nýja forsætisnefnd sem verður falið að fjalla um Klaustursmálið. Sigmundur Davíð Gunnlaugsson, formaður Miðflokksins, telur svo ekki vera en fjallað verður nánar um málið í fréttatímanum og greint frá málunum framundan á Alþingi.

Póst- og fjarskiptastofnun lýsir áhyggjum yfir því að samkvæmt nýju frumvarpi samgönguráðherra um netöryggismál, sé stofnuninni ekki tryggð næg réttindi til að framfylgja hlutverki sínu. Forstjóri Póst og fjarskiptastofnunar kveðst óttast að Ísland verði eftirbátur annarra landa í netöryggismálum. Fyrirhuguð vegagerð á Vestfjörðum er mikið hitamál en í fréttatímanum segjum við frá nýustu vendingum vegna ósamkomulags um hvar skuli leggja veg um Reykhólasveit. Þá sýnum við myndir af sjaldséðum blóðrauðum almyrkva á tungli sem sást frá Íslandi snemma í morgun en fyrirbærið mun ekki sjást næst fyrr en árið 2022.

Þetta og margt fleira í kvöldfréttum Stöðvar 2, Bylgjunnar og Vísis, í opinni dagskrá klukkan 18:30.