Sport

Annar heimamaðurinn fékk rassskell en hinn bauð upp á sýningu

Óskar Ófeigur Jónsson skrifar
Þetta var mjög erfitt kvöld fyrir Raymond van Barneveld sem fékk skell þrátt fyrir frábæran stuðning frá löndum sínum.
Þetta var mjög erfitt kvöld fyrir Raymond van Barneveld sem fékk skell þrátt fyrir frábæran stuðning frá löndum sínum. Getty/Dean Mouhtaropoulos
Raymond Van Barneveld tókst ekki að bjarga sæti sínu í úrvalsdeildinni í pílu en áttunda kvöldið fór fram í Rotterdam í gærkvöldi og það níunda er strax í kvöld.

Úrvalsdeildin í pílu var í sviðsljósinu á Stöð 2 Sport í gær og verður aftur á besta tíma á stöðinni í kvöld. Útsendingin kvöldsins hefst klukkan 19.00 á Stöð 2 Sport 2.

Hollendingurinn Van Barneveld var í níunda og neðsta sæti fyrir gærkvöldið og tókst ekki að breyta því. Þvert á móti fékk heimamaðurinn 7-1 skell á móti Daryl Gurney og þetta var því mjög erfitt kvöld fyrir þessa hollensku goðsögn í píluheiminum.

Tíu þúsund manns voru í salnum og flestir klæddir í appelsínugult. Í stað þess að fá sigur hjá landa sínum sem allra dreymdi um varð niðurstaðan aðeins vandræðalegt tap.

„Það var erfitt að spila í þessum kringumstæðum. Barney er augljóslega goðsögn í þessari íþrótt og hann var að spila fyrir framan ótrúlega áhorfendur. Ég hafði verk að vinna og skilaði því. Þetta var ekki mitt besta en í svona leikjum skiptir það bara máli að vinna,“ sagði Daryl Gurney eftir að hafa rasskellt heimamanninn og goðsögnina Van Barneveld.





Van Barneveld á ekki lengur möguleika á því að bjarga sæti sínu en skorið verður niður um einn keppenda eftir níu umferðir. Raymond van Barneveld er bara með 4 stig og það eru þrjú stig í næsta mann fyrir ofan.

Það er stutt á milli því níunda umferðin fer fram strax í kvöld. Van Barneveld keppir líka en getur ekki bætt stöðu sína í töflunni, aðeins reynt að bjarga heiðrinum.

Sem betur fer fyrir hollensku áhorfendurna þá áttu þeir annan mann og það gekk mun betur hjá heimsmeistaranum Michael van Gerwen sem náði aftur toppsætinu eftir 7-1 sigur á Skotanum litríka Peter Wright.

Van Gerwen tapaði fyrir þeim Wright og Van Barneveld á tvennukvöldunum í Rotterdam í fyrra en nú var allt annað að sjá til hans.

„Það var mjög mikilvægt fyrir mig að bjóða upp á smá sýningu fyrir aðdáendurna ekki síst vegna þess hvernig þetta fór hjá mér í fyrra. Ég var mjög ánægður með að vinna þetta 7-1,“ sagði Michael van Gerwen.

„Það er frábært að ná að vinna mann eins og Peter Wright 7-1. Mér líður vel og það er meira eftir á tankinum hjá mér. Það er frábær tilfinning að komast aftur upp í toppsætið,“ sagði Van Gerwen.

Van Gerwen mætir umræddum landa sínum Raymond van Barneveld í uppgjöri Hollendinganna í kvöld. Það má búast við miklu stuði þegar þeir glíma fyrir framan troðfulla höll af appelsínugulum löndum sínum.

Úrslitin í gærkvöldi:

Michael Smith 7-5 Gerwyn Price

James Wade 6-6 Dimitri Van den Bergh

Rob Cross 5-7 Mensur Suljovic

Michael van Gerwen 7-1 Peter Wright

Raymond van Barneveld 1-7 Daryl Gurney





Staðan í deildinni:

Michael van Gerwen 11 stig

Rob Cross 11 stig

Mensur Suljović 10 stig

James Wade 9 stig

Daryl Gurney 9 stig

Peter Wright 8 stig

Gerwyn Price 7 stig

Michael Smith 7 stig

Raymond van Barneveld     4 stig

Leikir kvöldsins

Daryl Gurney - Mensur Suljovic

Peter Wright - Gerwyn Price

Rob Cross - Jeffrey de Zwaan

Raymond van Barneveld - Michael van Gerwen

James Wade - Michael Smith

Aðrar íþróttir

Mest lesið


Fleiri fréttir

Sjá meira


×

Mest lesið