Telja ólíklegt að Ísland komist á EM í gegnum riðilinn

Úrslitaþjónusta Gracenote hefur farið í gegnum leiki í komandi undankeppni EM 2020 og reiknað út hvaða þjóðir eru líklegastar til að vera með á EM allstaðar sumarið 2020.

Í spá Gracenote kemur bæði fram prósentulíkur hverrar þjóðar og hvort að það líklegra að hún komist beint inn á EM í gegnum riðilinn eða þurfi að fara í gegnum umspilið.

Frakkland, sem er með okkur Íslendingum í riðli, er sú þjóð sem mestar líkur eru að komist á EM. Það eru 97 prósent líkur á því að Frakkar verði með í úrslitakeppninni en Frakkar eru heimsmeistarar síðan í Rússlandi síðasta sumar.  

Næst á eftir koma Belgía (95 prósent), England (90 prósent) og Spánn (89 prósent). Það eru einnig 86 prósent líkur á að Hollendingar verði með á EM allstaðar en hollenska landsliðið hefur misst af tveimur síðustu stórmótum, WEM 2016 og HM 2018. Ísland hefur aftur á móti verið með á þeim báðum.

Það eru síðan 85 prósent líkur á að Evrópumeistarar Portúgals fái tækifæri til að verja titil sinn sumarið 2020 og bæði þeir og Króatar (84 prósent) eiga meiri líkur á sæti á EM en Þjóðverjar (81%).

Samkvæmt líkunum þá endar Ísland í þriðja sæti í sínum riðli á eftir Frakklandi (97 prósent) og Tyrklandi (46 prósent) en það eru 42 prósent líkur á því að Ísland endi í öðru af tveimur efstu sætunum í riðlinum.

Það eru einmitt tvö efstu sætin í hverjum riðli sem gefa beint sæti á EM. Þrátt fyrir þetta eru 53 prósent líkur á að Ísland komist á EM 2020 en þá í gegnum umspilið sem verður spilað í lok mars 2020.

Í samantekt Gracenote má einnig sjá hvaða þjóðir eiga engan möguleika á sæti á EM. Úr okkar riðli eru það þrjú lið eða Andorra, Albanía og Moldóva.