Aðstoðarstjóri Klopp segir miðjumann Wolves vekja áhuga Liverpool

Pep Lijnders, aðstoðarþjálfari Liverpool, segir að Ruben Neves, miðjumaður Wolves, gæti verið leikmaður sem liðið hefði áhuga á.

Portúgalinn gekk í raðir Wolves sumarið 2017 og hefur spilað mikilvægt hlutverk í liði Wolves það sem af er leiktíðinni í úrvalsdeildinni en Wolves hefur gert afar góða hluti í deildinni.

Lijnders vann saman með Neves hjá Porto en Lijnders var þar í sjö ár. Hann hrósaði hinum 22 ára gamla Neves í hástert í samtali við vefmiðilinn O Joga.

„Ég þekki hann mjög vel, hans hugarfar, ástríðu hans fyrir leiknum og hversu mikill atvinnumaður hann er. Ég veit hversu mikið hann gefur liðinu og hann er leikmaður sem vekur alltaf áhuga okkar,“ sagði Lijnders.

„Ég þekkti hann er hann kom til Wolves. Ég sá tæknina og atvinnumennskuna. Ég sá leikmanninn sem ég þekkti frá tímabilinu 2013/2014.“

Neves á fjögur ár eftir af samningi sínum við Wolves en hann hefur skorað tíu mörk í þeim 77 leikjum sem hann hefur spilað fyrir Wolves.