424 milljarða þrot Baugs

Rúmum áratug eftir að Baugur Group hf. var úrskurðað gjaldþrota í Héraðsdómi Reykjavíkur er skiptum á þrotabúinu nú lokið. Samkvæmt tilkynningu um skiptalok í Lögbirtingablaðinu námu lýstar kröfur í þrotabúið tæpum 424 milljörðum króna sem gerir þetta að einu stærsta, ef ekki allra stærsta, gjaldþroti Íslandssögunnar.

Í tilkynningu kemur fram að forgangskröfur hafi fengist greiddar að fullu en 6,7 milljarðar fengist upp í almennar kröfur eða sem nemur 2,7 prósentum.

Fjárfestingarfélagið Baugur Group hf. var stofnað af Jóni Ásgeiri Jóhannessyni og var stórtækt í viðskiptum á árunum fyrir hrun. Félagið var úrskurðað gjaldþrota 13. mars 2009. Fréttablaðið er í eigu Ingibjargar Pálmadóttur, eiginkonu Jóns Ásgeirs.