Segir mjög veika von um að Jón Þröstur sé á lífi

Bróðir Jóns Þrastar Jónssonar sem hvarf á dularfullan hátt á Írlandi fyrir rúmum fjórum mánuðum segir vonina um að Jón Þröstur sé á lífi mjög veika. Engar nýjar upplýsingar hafi komið fram í málinu. Hann segir einhvers konar málalok nauðsynleg til að geta horft fram á veginn og verið til staðar fyrir sína nánustu.

Fyrir rúmum fjórum mánuðum hvarf Jón Þröstur sporlaust í Dublin. Síðast sást til hans á gangi nærri hótelinu sem hann gist á ásamt kærustu sinni.

Davíð Karl bróðir Jóns Þrastar segir að annar bróðir sinn sé í Dublin þar sem hann hafi komið fram í fjölmiðlum og verið í sambandi við lögreglu. Engar nýjar vísbendingar hafi komið fram.

„Þetta er ekki sama orka og mannafli sem fer í málið en engu að síður liggur það inn á borði hjá þeim og ef ábendingar berast sinna þeir þeim,“ segir Davíð.

Lifir þú enn í voninni um að hann finnist og sé á lífi?

„Ég auðvitað lifi í voninni. Ég vona það besta en vonin er mjög veik. Mín helsta von er að það komi einhver málalok. Ég er ekkert voðalega vongóður nei, alls ekki. Enda er langt um liðið og ekkert að frétta. En ég vona innilega fjölskyldunnar vegna að þetta leysist samt sem áður. Ég er eiginlega búinn að sætta mig við slæma niðurstöðu úr þessu máli.“

Davíð er opinskár um líðan sína og annarra fjölskyldumeðlima. Fólk takist mismunandi á við áfalllið, óvissuna og sorgina.

„Ég reyni að heiðra minningu hans og halda henni á lofti og hugsa hlýtt til hans. Ég reyni að tækla þetta þannig eins og hann sé ekki meðal vor ennþá, en auðvitað vona það besta.“

Er erfitt að segja þetta?

„Það er mjög erfitt. Ég veit ekki nákvæmlega hvernig ég á að koma þessu frá mér snyrtilega. Mér hefur liðið gífurlega illa og þetta hefur legið mjög þungt á mér. Ég er viss um að það á við alla sem standa honum næst. Fyrir mitt leyti varð ég einhvern veginn að fá málalok til þess að geta verið til staðar, sérstaklega fyrir börnin mín og Katrínu kærustuna mína. Þetta var svona sú nálgun sem ég tók á málið eins og staðan er núna.“

Móðir Jóns Þrastar sagði í viðtali við DV á dögunum að hún teldi að Jón Þröstur hafi tekið afdrifaríka ákvörðun og einhver búi yfir meiri upplýsingum en komið hafi fram.

„Auðvitað er á reiki hvort hann hafi talað við einhvern kvöldið áður og annað. Það getur auðvitað skipt máli. En ef hann hefur tekið þessa afdrifaríku ákvörðun að taka eigið líf eru meiri líkur á að aðrir hlutir hafi haft eitthvað með það að gera,“ segir Davíð.

Hann telur ekki að eitthvað saknæmt hafi átt sér stað.

„Þá er auðvitað ekki margt sem kemur til greina, að hann hafi mögulega látið sig hverfa eða tekið eigið líf. Ég tel ekki að hann hafi látið sig hverfa, mér finnst það mjög ólíklegt.“

Í spilaranum hér að neðan má horfa á lengri útgáfu viðtalsins við Davíð Karl.