Sjáðu stiklu fyrir nýju Top Gun myndina

Út er komin ný stikla fyrir kvikmyndina Top Gun: Maverick, en það er framhaldsmynd hinnar sígildu kvikmyndar Top Gun sem kom út árið 1986.

Top Gun: Maverick segir frá orrustuflugmanninum og kafteininum Peter „Maverick“ Mitchell, sem eins og í fyrri myndinni er aðalpersónan og er leikinn af Tom Cruise. Myndin gerist 34 árum eftir atburði fyrstu myndarinnar, em sagt árið 2020.

Maverick mætir mörgum áskorunum í nýju myndinni en meðal þess sem hann reynir að gera er að leiðbeina syni Goose, fallins félaga Mavericks, til þess að verða orrustuflugmaður líkt og faðir sinn.

Stiklan hefur vakið gríðarlega athygli en innan við sólarhring eftir að hún var sett á YouTube hafa tæpar níu milljónir borið hana augum. Myndin verður frumsýnd þann 26. júní á næsta ári.