Leki kom að bát norður af Hornströndum

Björgunarskipin á Ísafirði og Bolungarvík voru kölluð út á áttunda tímanum í morgun vegna báts sem var í vanda um þremur sjómílum norður af Kögri á Hornströndum.

Leki hafði komið að bátnum í morgun vegna bilunar og þurfti að koma dælum um borð. Þetta kemur fram í tilkynningu frá Landsbjörg.

Björgunarskipið Kobbi Láka var komið að bátnum um 40 mínútum eftir að útkallið barst með dælur og var hafist handa við að dæla sjó úr bátnum.

„Það gekk nokkuð vel og tókst að halda í við lekann. Stuttu síðar kom björgunarskipið Gísli Jóns á vettvang með fleiri dælur og þegar búið var að dæla vel af sjó úr bátnum var hann tekin í tog. Gísli Jóns er nú á leiðinni með bátinn til Bolungarvíkur í fylgt Kobba Láka,“ segir í tilkynningu Landsbjargar.