Hornafjarðarflugvöllur með blæ alþjóðavallar

Annir voru á Hornafjarðarflugvelli í morgun þegar þar voru á sama tíma Bombardier Q400 vél frá Flugfélagi Íslands og Jetstream-vél frá Flugfélaginu Erni. Flugfélagsvélin var í leiguflugi með 63 manna hóp erlendra ferðamanna en Ernis-vélin í hefðbundnu áætlunarflugi. 

Við flugstöðina beið floti sérútbúinna jeppa frá hornfirska fyrirtækinu Ice Explores, ásamt rútubílum. Samkvæmt upplýsingum starfsmanns Ernis á flugvellinum, sem annaðist afgreiðslu beggja véla, var ferðahópurinn á leið í dagsferð að Jökulsárlóni. Hópurinn flýgur aftur til Reykjavíkur síðdegis og er þá aftur von á Bombardier-vél um svipað leyti og vél Ernis lendir þar einnig í áætlunarflugi.

Hornfirðingar hafa áður séð meiri umsvif á flugvellinum, að sögn Ásgeirs Núpans Ágústssonar flugvallarvarðar. Í fyrra gerðist það að tvær Bombardier Q400 og ein Bombardier Q200 frá Flugfélaginu voru þar á sama tíma og Jetstream-vél frá Erni. 

Sjaldgæft er að svo stór vél sem Q400 lendi á Hornafirði en hún tekur 76 farþega. Hún er þó ekki sú stærsta sem þangað hefur komið en flugbrautin er 1.500 metra löng. Að sögn Ásgeirs flugvallarvarðar á fjögurra hreyfla farþegaþota færeyska félagsins Atlantic Airways metið, vél af gerðinni BAe 146. Sú hafði 95 sæti um borð og flutti Karlakór Hornafjarðar í söngferðalag til Færeyja. 

Lending slíkrar vélar beint frá útlöndum yrði þó ekki leyfð í dag þar sem Hornarfjarðarflugvöllur er ekki lengur skilgreindur sem alþjóðavöllur.  Til að fá tollafgreiðslu yrði slík vél fyrst að lenda á einhverjum þeirra fjögurra valla, sem hafa stöðu alþjóðaflugvallar hérlendis, en þeir eru Keflavík, Reykjavík, Akureyri og Egilsstaðir.

Þessu vilja Hornfirðingar breyta svo unnt sé til dæmis að taka á móti einkaþotum beint frá útlöndum. Þá hefur í tengslum við mikil uppbyggingaráform ferðaþjónustu í Lónssveit verið minnt á þörfina að breyta stöðu Hornafjarðarflugvallar. Jafnframt þykir öryggi fyrir flugmenn skammdrægra véla á ferð milli Íslands og Skotlands að geta haft Hornafjörð í bakhöndinni en hann er sá völlur hérlendis sem næstur er Bretlandseyjum. 

Bent er á að á Hornafirði sé þegar sinnt tollafgreiðslu gagnvart alþjóðlegri skipaumferð um Hornafjarðarhöfn. 

Hér má sjá frétt Stöðvar 2 fyrir tveimur árum um áformin í Lóni og tengingu þeirra við Hornafjarðarflugvöll.