Sackler fjölskyldan flutti 125 milljarða á erlenda bankareikninga

Sackler fjölskyldan er sögð hafa millifært minnst einn milljarð Bandaríkjadala, sem nemur um 125 milljörðum íslenskra króna, yfir á mismunandi bankareikninga, þar á meðal í banka í Sviss. Þetta segja yfirvöld í Bandaríkjunum.

Sackler fjölskyldan á lyfjafyrirtækið Purdue Pharma, sem stendur nú í málaferlum í Bandaríkjunum en fyrirtækið hefur verið ákært fyrir að hafa blásið ópíóðakrísunni í Bandaríkjunum byr undir báða vængi með því að markaðsetja lyf líkt og OxyContin á blekkjandi hátt.

Meira en tvö þúsund aðilar hafa kært Purdue og þar á meðal eru meira en 20 sambandsríki.

Tímaritið Forbes hefur metið fjárhag Sackler fjölskyldunnar nema 13 milljörðum Bandaríkjadala, 1.623 milljörðum íslenskra króna, en mörg sambandsríkjanna telja að fjölskyldan hafi falið töluvert fjármagn í erlendum skattaskjólum.

Yfirsaksóknari New York ríkis, Letitia James, segir að hún hafi krafist bókhalds 33 fyrirtækja sem tengjast fjölskyldunni. Vitað er um milljarðana 125 eftir að gögn eins fyrirtækjanna voru birt embætti hennar.

„Gögn frá einu fyrirtækjanna sýna að fjölskyldumeðlimir Sackler og fyrirtæki í þeirra eigu hafi millifært um það bil 125 milljarða, þar á meðal inn á bankareikninga í Sviss,“ sagði James í yfirlýsingu og staðfesti þar með fregnirnar sem New York Times greindi fyrst frá.

Fyrirtækin sem um ræðir voru ekki nafngreind.

Ekki allir sækjendur sáttir með samninginn

Talsmaður Mortimer DA Sackler, fyrrverandi stjórnarmeðlims fyrirtækisins samnefnda, sagði í tilkynningu að „millifærslurnar, sem væru meira en áratugar gamlar, væru ekkert fréttaefni enda fullkomlega löglegar og viðeigandi að öllu leiti.“

„Þetta er illviljuð tilraun skrifstofu saksóknara til að framleiða niðrandi fyrirsagnir í von um að eyðileggja sáttasamninga sem kæmi öllum aðilum jafn vel. Sáttasamningar eru studdir af mörgum öðrum ríkjum og myndi borga sig þar sem milljarðar dollara myndu renna til samfélaga og einstaklinga víða um landið sem þurfa á hjálp að halda,“ bætti talsmaðurinn við.

Tilkynnt var á fimmtudag að Purdue Pharma hafi samþykkt bráðabirgða sáttasamning upp á marga milljarða Bandaríkjadala til að forðast réttarhöld.

Samkvæmt samningnum, sem enn á eftir að skrifa undir, mun Sackler fjölskyldan gefa upp völd yfir Purdue og greiða úr eigin vasa 3 milljarða dala, eða hátt í 375 milljarða íslenskra króna.

Þá myndi fyrirtækið lýsa yfir gjaldþroti og leysast upp og yrði þar af leiðandi ekki réttað yfir fyrirtækinu en réttarhöld áttu að hefjast í næsta mánuði.

Hins vegar lýstu nokkur ríki, þar á meðal New York, Massachusetts og Connecticut, því yfir að þau myndu ekki samþykkja samninginn og myndu halda málaferlum til streitu.

Höfuðstöðvar fyrirtækisins eru í Connecticut en William Tong, ríkissaksóknarinn þar, sagði: „Umfang sársaukans, dauðans og eyðileggingarinnar sem Purdue og Sackler fjölskyldan hafa valdið eru mun meiri en tilboð þeirra heyrir upp á.“

Josh Shapiro, lögmaður Pennsylvaniu fylkis, sagði að sáttasamningurinn væri „kinnhestur fyrir alla þá sem hafa þurft að bera aðstandendur til grafar vegna eyðileggingar þessarar fjölskyldu og græðgi hennar.“

„Samningurinn gerir Sackler fjölskyldunni kleift að ganga í burtu sem milljarðamæringar og án þess að lýsa yfir ábyrgð,“ bætti hann við.