Fýldur karl eða kona úr Garðabæ

Um helgina verður gengið frá því innan Sjálfstæðisflokksins hver tekur við af Áslaugu Örnu Sigurbjörnsdóttur sem ritari flokksins. Samkvæmt lögum flokksins gengur ekki að ritari sé jafnframt í ráðherraliðinu en Áslaug Arna var nýverið skipuð dómsmálaráðherra.

Tveir hafa gefið sig fram og vilja verða ritarar. Annars vegar er um að ræða Áslaugu Huldu Jónsdóttur sem er formaður bæjarráðs Garðabæjar. Og hins vegar er um að ræða Jón Gunnarsson þingmann flokksins. Frá þessu verður gengið á flokksráðsfundi Sjálfstæðisflokksins sem haldinn verður á morgun á Hilton Reykjavik Nordica.

Sjálfkjörið í stöðuna „næstum því ráðherra“

Brynjar Níelsson þingmaður Sjálfstæðisflokksins veltir þessu fyrir sér í knöppum pistli sem hann birti á Facebooksíðu sinni nú í morgun.

„Nú á að kjósa nýjan ritara Sjálfstæðisflokksins um helgina, sem er mikilvægt og merkilegt djobb. Þar keppa fýldur miðaldra karl og ung kona úr Garðabæ. En það vita ekki allir að til er enn merkilegri staða innan flokksins, sem er „næstum því ráðherra“. Í hana hefur verið sjálfkjörið seinustu ár.“

 

Gera má því skóna að hann sé að vísa til sjálfs sín þegar hann talar um stöðuna „næstum því ráðherra“ en hann þótti koma til álita sem ráðherraefni í dómsmálaráðuneytið sökum reynslu sinnar og fylgis.

Verður beini hent í hina ósáttu?

Ekki er óvarlegt að ætla að Brynjar telji annarleg sjónarmið ráða för þegar skipað er í stöður, jafnt innan sem utan Sjálfstæðisflokksins. Og sér ekki fyrir að það breytist í bráð.

En, þó má gera ráð fyrir því að um spennandi kosningar verði að ræða. Miklar vangaveltur voru uppi um það hvern Bjarni Benediktsson myndi velja til að koma í ráðherraliðið og toguðust þar á ýmis sjónarmið. Það sem Áslaug Arna þótti hafa á móti sér var einkum það að hún var jú, ritari flokksins. Þá hefur forystusveit flokksins verið vænd um að vera of einsleit og eitthvað þurfi til að sefa óánægju sem magnast hefur upp vegna ýmissa mála svo sem orkupakkans og þungunarrofsmálsins. Áslaug Arna er ekki hátt skrifuð meðal hinna ósáttu.

Þá er spurt hvort Jón, sem Brynjar kallar fýldan karl eða Áslaug Hulda sem Brynjar segir konu úr Garðabæ, séu í meiri metum meðal þess hóps sem margir telja vert að henda þurfi í beini. Eða þá hreinlega hvort sá hópur er og þykir vera orðinn algerlega áhrifalaus innan Sjálfstæðisflokksins og engin ástæða sé að líta til? Ekki þarf að kalla til stjórnmálafræðing til að útskýra hvorn frambjóðandann íhaldssamari armurinn myndi heldur vilja sjá í stöðu ritarans.