Hross hljóp út í myrkrið eftir harðan árekstur

Ökumaður nokkur ók á hross á Þykkvabæjarvegi í liðinni viku. Bíllinn skemmdist mikið en ekkert liggur fyrir um líðan hrossins þar sem það hljóp út í myrkrið eftir áreksturinn. Þetta kemur fram í uppgjöri Lögreglunnar á Suðurlandi fyrir síðustu viku.

Þá var ekið á lamb á Meðallandsvegi á laugardaginn. Lambið drapst við áreksturinn og er bíllinn verulega skemmdur.

Laus hundur hljóp í veg fyrir bifreið á Suðurlandsvegi við Laugardæli í vikunni þannig að ökumaður hennar þurfti aðnauðhemla til að koma í veg fyrir að aka á dýrið. Hundurinn hljóp af vettvangi og eigandi var hvergi sjáanlegur.

Veistu meira um málið? Sendu okkur línu á ritstjorn(hja)visir.is. Fullum trúnaði heitið.