Hviður gætu náð allt að 35 metrum á sekúndu

Veðurstofan hefur gefið út gula viðvörun fyrir Suðurland, Faxaflóa og miðhálendið þar sem búast má við hvassviðri eða stormi á morgun og fram á laugardag. Gætu staðbundnar hviður náð allt að 35 metrum á sekúndu.

Eiríkur Örn Jóhannesson, veðurfræðingur á Veðurstofu Íslands, segir um hefðbundna haustlægð að ræða þótt ekki fylgi mikil úrkoma.

Þá er von á annarri lægð eftir helgi sem mun hafa áhrif víðar um landið eins og spár líta út í augnablikinu að sögn Eiríks.

Að því er segir á vef Veðurstofunnar mun viðvörunin taka gildi klukkan níu á morgun á Suðurlandi, klukkan tólf á hádegi á miðhálendinu og klukkan fjögur eftir hádegi á Faxaflóa.

Gildir viðvörunin svo til klukkan tólf á hádegi á laugardag á Suðurlandi og miðhálendinu en til klukkan níu um morguninn á Faxaflóa.

Á Suðurlandi má búast við 18 til 25 metrum á sekúndu en hvassast verður við ströndina. Þá má búast við snörpum vindhviðum við fjöll, staðbundið 35 metrar á sekúndu, einkum undir Eyjafjöllum.

Svipað verður uppi á teningnum við Faxaflóa þar sem einnig má búast við svo snörpum hviðum, einkum á Kjalarnesi og við Hafnarfjall.

„Varasamar aðstæður fyrir ökutæki, einkum fyrir þau sem taka á sig mikinn vind. Fólk er hvatt til að sýna aðgát og ganga frá lausum munum til að forðast tjón,“ segir á vef Veðurstofunnar.

Á miðhálendinu má búast við stormi eða roki, 20 til 28 metrum á sekúndu.

„Búast má við mjög snörpum og varhugaverðum vindhviðum við fjöll, 30-40 m/s og sandfoki. Varasamar eða hættulegar aðstæður fyrir ferðamenn. Fólki bent á að sýna varkárni og fylgjast með veðurspám,“ segir í viðvörun Veðurstofunnar.