Kjaramál Play brjóti í bága við „allar grunnstoðir stéttarfélaga“

Drífa Snædal, forseti Alþýðusambandsins, segir það vekja „verulegar áhyggjur“ að lággjaldaflugfélagið Play hafi samið um kaup flugliða og flugmanna áður en nokkur slíkur hafi verið ráðinn. Erfitt sé því að sjá að þessar stéttir hafi komið að gerð eigin samnings. Fyrirætlanir flugfélagsins um að ná fram lægri launakostnaði en hið fallna WOW air og meiri nýtingu úr starfsfólki séu aukinheldur aðfinnsluverðar.

Fréttir sem unnar voru upp úr fjárfestakynningu Play í gær vöktu athygli, ekki síst vegna fullyrðinga sem þar birtast um kostnaðaraðhald flugfélagsins. Þannig segjast stjórnendur Play hafa náð fram 27 til 37 prósenta lækkun launakostnaðar, í samanburði við WOW air, auk þess sem nýting á áhöfnum verði um tvöfalt meiri en gengur og gerist hjá Icelandair.

Sjá einnig: Starfsmenn Play megi búast við lægri launum og meiri vinnu

Forseti ASÍ segir þessar fregnir varhugaverðar. Í pistli sem Drífa birtir í dag segir hún að þrátt fyrir að landsmenn njóti þess að fá ódýrt flug séu aðrir sem þurfi að greiða fargjaldið, sé það of lágt. Drífa vísar þar til áhafna Play og spyr forseti ASÍ hvernig flugfélagið ætli sér að „greiða enn lægra verð fyrir vinnuframlag en gert var hjá WOW og nú er gert hjá Icelandair.“

Forseti ASÍ geldur jafnframt varhug við því að flugfélagið hafi samið við stéttarfélag flugmanna og flugliða, Íslenska flugstéttarfélagið, án þess að „nokkur flugliði [hafi] verið ráðinn og erfitt að sjá hvort einhver flugliði hafi komið að eigin samningi.“ Því sé erfitt að sjá að fulltrúar stéttarinnar hafi haft aðkomu að því að semja um eigin kaup og kjör, eins og viðgengst meðal annarra stétta.

„Þetta brýtur í bága við allar grunnstoðir stéttarfélaga og rétt þeirra til þess að tryggja hagsmuni félagsmanna sinna með kjarasamningum. Grunnhugsunin er að vinnandi fólk kemur sér saman í stéttarfélag, kýs sér fulltrúa sem setjast svo við samningaborðið. Stéttarfélögin bindast svo heildarsamtökum til að búa til enn meiri slagkraft og njóta samstöðunnar þegar í harðbakkann slær,“ skrifar Drífa og vísar til þeirra þjónustu sem stéttarfélög veittu starfsmönnum WOW eftir gjaldþrot flugfélagsins. 

„Það er skýr krafa til nýrra fyrirtækja á markaði að þau virði leikreglur hins íslenska vinnumarkaðar. Undirboð í kjörum kemur öllum við og bitnar á endanum á samfélaginu öllu, bæði launafólki og þeim fyrirtækjum sem virða leikreglur,“ skrifar Drífa í pistli sínum sem má nálgast hér.

Vísir hefur óskað eftir viðbrögðum frá Play vegna athugasemda Alþýðusambandsins. ASÍ hefur áður sett út á kjaramál flugfélagsins, það gerði Alþýðusambandið strax á þriðjudag eftir blaðamannafund Play í Perlunni.