Starfsmenn Play megi búast við lægri launum og meiri vinnu

Þau sem sótt hafa um stöðu flugliða og flugmanna hjá flugfélaginu Play mega gera ráð fyrir að fá lægri laun en starfsmenn WOW air fengu á sínum tíma. Að sama skapi geta þau átt von á því að vinna meira en sambærilegir starfsmenn Icelandair. Þetta er meðal þess sem Kjarninn segir að komi fram í fjárfestakynningu Play, sem Íslensk verðbréf kynntu fyrir fjárfestum í síðustu viku.

Launakostnaður íslenskra flugfélaga hefur verið hár í samanburði við samkeppnisfélög í flugi til og frá landinu. Launakostnaður Icelandair Group var þannig 37,9 prósent af tekjum félagsins á fyrri hluta ársins, en til samanburðar hefur hlutfallið verið um 22 prósent hja SAS og British Airways.

Eins og fram kom á blaðamannafundi Play á þriðjudag hafa stjórnendur flugfélagsins „einbeitt sér að kostnaðarhliðinni,“ og má ætla að fyrrnefnd kostnaðarlækkun félagsins þegar kemur að flugmönnum og flugliðum sé liður í því. Í fjárfestakynningunni á að koma fram að lækkunin nemi um 27 til 37 prósentum miðað við þá samninga sem WOW gerði við þessar starfstéttir.

Þar að auki ætli Play sér að auka nýtingu á áhöfnum sínum. Stefnan sé sett á að hver áhöfn afkasti um 800 til 900 klukkustunda nýtingu á mánuði, samanborið við 550 klukkstunda nýtingu meðal áhafna Icelandair.

Arnar Már Magnússon, forstjóri Play, tók skýrt fram að flugfélagið væri íslenskt og laun yrðu greidd samkvæmt íslenskum samningum. Alþýðusambandinu þótti það þó greinilega ekki trúverðugt heldur sendi út fréttatilkynningu skömmu eftir fundinn þar sem þess var krafist að Play myndi ganga til samninga áður en starfsemi félagsins hæfist af alvöru. „ASÍ treystir því að hið nýja fyrirtæki ætli sér ekki að keppa á íslenskum flug- og ferðamarkaði á grundvelli félagslegra undirboða,“ eins og þar sagði.

Fram kom á fyrrnefndum blaðamannafundi á þriðjudag að Play hefði þegar gengið til kjarasamninga fyrir flugmenn og flugliða. Stéttirnar eru meðlimir Íslenska flugstéttarfélagsins (ÍFF) sem var áður stéttarfélag flugmanna WOW air.

Sjá einnig: Hátt í þúsund manns sótt um vinnu hjá Play

Samningurinn við ÍFF er sagður sambærilegur þeim „sem flug­fé­lög eru að gera t.d. í Dublin og á öðrum hag­kvæmum flug­rekstr­ar­stöð­u­m,“ eins og Kjarninn tekur upp úr fjárfestakynningunni. Formaður Flugfreyjufélags Íslands hefur þegar lýst efasemdum um þetta fyrirkomulag Play, segir það vekja upp spurningar þegar „sér­stak­lega er stofnað nýtt stétt­ar­fé­lag eða deild inn­an stétt­ar­fé­lags – sem geng­ur á aðild­ar­svæði stétt­ar­fé­lags sem fyr­ir er – sam­hliða stofn­un nýs fyr­ir­tæk­is,“ eins og Berglind Hafsteinsdóttir orðaði það við Morgunblaðið. 

Þetta opni á það að félagið geri sína eigin kjarasamninga, eins og virðist vera að koma á daginn samkvæmt fjárfestakynningunni, og þannig undirboðið þá samninga sem Flugfreyjufélagið er með sína viðsemjendur.

Upplýsingafulltrúi Play segist gera ráð fyrir almennri sátt um kjarasamning flugfélagsins við ÍFF. Markmiðið sé að gera flugfélagið að eftirsóttum vinnustað, sanngjarnir kjarasamningar séu liður í því.