„Ásakanir Samherja í garð fréttamannsins um ósannindi eru fráleitar“

Rakel Þorbergsdóttir, fréttastjóri og ritstjóri fréttaskýringaþáttarins Kveiks, segir fullyrðingar Samherja síðustu daga um meintar rangfærslur RÚV ekki eiga við rök að styðjast.

Í opnu bréfi sínu til Samherja sem Rakel skrifar undir fyrir hönd ritstjórnar Kveiks, hafnar hún einnig ásökunum félagsins á hendur fréttamanninum Helga Seljan sem hafa verið mikið til umræðu síðustu daga.

„Ásakanir Samherja í garð fréttamannsins um ósannindi eru fráleitar. Virðast í raun snúast um tilraun fyrirtækisins til að afvegaleiða umræðuna með því að vega persónulega að fréttamanninum og draga úr trúverðugleika hans. Og líta alfarið fram hjá þeim upplýsingum og gögnum sem komu fram í þætti Kveiks 12. nóvember og ummæli hans byggjast á,“ skrifar Rakel í svari sínu.

Svarar ásökunum um uppspuna og ósannindi

Svar RÚV kemur í kjölfar þriggja harðorðra tilkynninga frá Samherja þar sem félagið sakar RÚV og Helga Seljan meðal annars um „uppspuna“ og „ítrekuð ósannindi“ í umfjöllun sinni um starfsemi Samherja í Namibíu.

Síðast í dag sakaði fyrirtækið RÚV um rangfærslur og fullyrti meðal annars að miðlarnir Stundin og RÚV hafi sagt félagið Cape Cod FS á Marshall-eyjum hafa verið í eigu Samherja. Í tilkynningu sinni vildi félagið árétta að umrætt félag hafi aldrei verið í eigu eða undir stjórn Samherja.

Í svari sínu í kvöld segir Rakel að aldrei hafi verið fullyrt í umfjöllun Kveiks að Samherji hafi átt fyrrnefnt félag.

„Hið rétta er að Kveikur sagði frá því að Samherji notaði félagið og að starfsmaður útgerðarinnar hafi haft prókúru á reikningum þess í norska bankanum DNB,“ segir Rakel.

Bendir hún jafnframt á að í fyrri þætti Kveiks um Samherjaskjölin hafi komið fram að norski DNB bankinn hafi talið Cape Cod FS vera í eigu Samherja í ljósi prófkúru starfsmannsins. Sú fullyrðing væri byggð á gögnum sem WikiLeaks hafi birt.

 

Vísaði í ummæli uppljóstrarans

Þann 26. nóvember síðastliðinn ásakaði Samherji Helga Seljan, fréttamann RÚV og einn þáttastjórnenda Kveiks, um uppspuna eftir að hann fullyrti í Morgunútvarpi Rásar 2 að yfir „þúsund störf“ hafi tapast í namibískum sjávarútvegi vegna Samherja.

Rakel fullyrðir að Helgi hafi þar verið að vísa með beinum hætti í orð Jóhannesar Stefánssonar, fyrrverandi starfsmanns Samherja, sem hann lét falla í áðurnefndum þætti. Rakel segir aðrar heimildir Kveiks jafnframt styðja þá frásögn, þar á meðal skrif namibískra fjölmiðla.

Helgi Seljan hafði þá áður svarað ásökunum félagsins um rangfærslur í Morgunútvarpinu með því að vísa í fréttir namibískra fjölmiðla. Þar voru uppsagnir hjá sjávarútvegsfyrirtækinu Namsov meðal annars tengdar við breytingar á reglum um úthlutun aflaheimilda í landinu.

 

Samherji segir engin störf hafa glatast

Samherji tók það þó ekki í mál og svaraði Helga aftur með tilkynningu þar sem talað var um „ítrekuð ósannindi fréttamanns.“

„Fyrst skal áréttað að engin störf glötuðust í namibískum sjávarútvegi eftir breytingar á úthlutun aflaheimilda í hrossamakríl heldur fluttust störfin milli fyrirtækja og skipa,“ sagði Samherji þá í tilkynningu sinni. Einnig benti fyrirtækið á að Namsov hafi lengst af ekki verið í eigu Namibíumanna heldur í eigu suður-afrísku samsteypunnar Bidvest Group.

Þá fullyrti Samherji jafnframt að fram til ársins 2012 hafi uppsjávarveiðar í landinu verið nær eingöngu í höndum fyrrnefnds Namsov og annars fyrirtækis sem hafi sömuleiðis verið lengst af undir suður-afrísku eignarhaldi.