Björgvin lokaði markinu í seinni hálfleik

Björgvin Páll Gústavsson átti stórleik í marki Skjern sem hafði betur gegn Sönderjyske í dönsku úrvalsdeildinni í handbolta í kvöld.

Björgvin Páll átti góðan leik í fyrri hálfleik en lokaði svo markinu í þeim seinni og endaði með 16 bolta varna og 40 prósenta markvörslu, þar af varði hann eitt vítaskot.

Elvar Örn Jónsson átti líka mjög góðan leik fyrir Skjern, en hann skoraði fimm mörk og var markahæstur ásamt Jesper Konradsson og Bjarte Myrhol.

Leikurinn endaði 30-25 fyrir Skjern en gestirnir í Sönderjyske höfðu verið marki yfir í hálfleik, 14-15. Í liði Sönderjyske skoraði Arnar Birkir Hálfdánsson tvö mörk og Sveinn Jóhannsson gerði eitt.

Topplið Álaborgar vann sannfærandi sigur á Nordsjælland 32-25 á útivelli.

Janus Daði Smárason skoraði fjögur mörk fyrir Álborg og gaf þrjár stoðsendingar.

Gestirnir frá Álaborg voru yfir allan leikinn, fyrir utan blábyrjunina og var sigur þeirra aldrei í hættu.