Bóndi í Svarfaðar­dal lýsir á­standinu sem skapaðist í ó­veðrinu sem hryllingi

Ágústa Ágústsdóttir, bóndi á Reistarnesi á Melrakkasléttu, og Bjarni Óskarsson, bóndi á Völlum í Svarfaðardal, gagnrýna stjórnvöld fyrir það ástand sem skapaðist á Norðurlandi í síðustu viku í óveðrinu sem þá gekk yfir landið. Víða var rafmagnslaust dögum saman með þeim afleiðingum að hús kólnuðu sums staðar og fjarskiptakerfi duttu út.

Þau Ágústa og Bjarni ræddu óveðrið og afleiðingar þess í Bítinu á Bylgjunni í morgun. Ágústa sagði að þrátt fyrir að þau á Reistarnesi hafi verið rafmagnslaus dögum saman þá hafi þau nánast verið í fimm stjörnu lúxusspa miðað við marga aðra á landinu þar sem þeim tókst til dæmis að verða ekki vatnslaus með lítilli rafstöð af næsta bæ.

Algjört bjargleysi í brjáluðu veðri

Hún nefndi fjarskiptakerfið sérstaklega og hversu mikið grundvallaratriði það væri þegar kemur að öryggi fólks.

„Þarna upplifði fólk algjört bjargleysi í brjáluðu veðri. Það var rafmagnslaust, hitalaust, fjarskiptakerfið datt út. Maður gæti bara spurt „Eru þið að djóka fyrir sunnan?“ Þarf að fara að flytja Alþingi út á land til að menn átti sig kannski á því að það býr á Íslandi? Og að hlusta á Katrínu Jakobs segja „Já, þetta er hræðilegt, við erum núna minnt illilega á að við búum á Íslandi.“ Maður bara svona „Fyrirgefðu, hvar eru þið búin að vera?“ sagði Ágústa.

Spurð út í áætlanir ríkisstjórnarinnar um að hún ætli að bregðast við því sem gerðist í óveðrinu kvaðst Ágústa spyrja á móti hvers vegna ekki væri löngu búið að gera eitthvað. Hún sagði að fólk væri farið að missa svolítið tengslin við landsbyggðina.

„Það er það sem er og ef stjórnvöld fara bara í einhverja sparileiðangra svona rétt fyrir kosningar út á landsbyggð og láta sig líta vel út, það eru engir landsbyggðarflokkar til lengur í mínum huga,“ sagði Ágústa.

Rafmagnslaust í sex sólarhringa og símasambandslaust í tvo sólarhringa

Bjarni var spurður að því hvernig hann hefði upplifað ástandið norður í Svarfaðardal í óveðrinu.

„Þetta var bara skelfing, hryllingur. Mig langar bara að byrja á því að hæla nágrönnum mínum á bæjunum í kringum mig því við vorum bara skilin eftir algjörlega bara í náttúrulega rafmagnsleysi og sambandsleysi. Það skipti sér enginn af okkur,“ sagði Bjarni.

Rafmagnslaust var á bæ Bjarna í tæpa sex sólarhringa og símasambandslaust í tvo sólarhringa en þau á Völlum voru heppin þar sem þau eru eini bærinn í Svarfaðardal með gaseldavél.

Þau voru því með þá nágranna sem komust til þeirra í mat í rafmagnsleysinu og sendu mat á þá bæ þar sem fólk komst ekki til þeirra.

Náðu að koma iðnaðarhurð á fjárhús sem voru að springa

„En það voru svo miklar hetjur þarna, hann Gunnsteinn á Sökku og Alli á Hánefsstöðum og sonur hans. Það voru fjárhús bara að springa inni á Búrfelli framar í Svarfaðardal, björgunarsveitir urðu frá að hverfa út af ofsanum en þá brutust þeir fram á traktor með planka og náðu að koma stórri bílskúrshurð í eða iðnaðarhurð við þvílíkar aðstæður að þeir fuku í hviðunum og þurftu að krafsa sig til baka. Þetta var ekkert venjulegt. Fólk gerir sér ekki grein fyrir því að þetta eru hetjurnar,“ sagði Bjarni.

Hann kvaðst þreyttur á ástandinu hér á landi þar sem innviðir væru látnir drabbast niður.

„Það er búið að losa allar vararafstöðvar í öllum landshlutum, það er búið að selja þetta eða hætta með þetta. Það er eins og menn hafi aldrei lent í vondu veðri fyrr. Það er búið að tálga innviðina, væntanlega til að laga efnahagsreikningana, ég veit það ekki,“ sagði Bjarni.

Viðtölin við þau Ágústu og Bjarna má heyra í heild sinni í spilaranum hér fyrir neðan.