Stjörnum prýtt partí hjá Aroni og Kristbjörgu

Landsliðsfyrirliðinn Aron Einar Gunnarsson og athafnarkonan Kristbjörg Jónasdóttir blésu til heljarinnar kynningarpartýs í gær í tilefni afhjúpunar AK Pure Skin húðvörulínunnar, sem þau hjónin hafa unnið að síðustu þrjú árin.

Margt var um manninn og stemningin gríðarlega góð en partýið var haldið í einum flottasta sal landsins um þessar mundir, Sjálandssalnum í Garðabæ, nýjustu viðbótinni í flóru glæsilegra veitingastaða í Garðabæ sem opnaður verður á næsta ári. 

Fjölmargir félagar Arons úr fótboltanum létu sjá sig og sömuleiðis helsta heilsu- og líkamsræktarfólk landsins í bland við rithöfunda, rappara og vitaskuld fjölskyldu og vini þeirra Arons og Kristbjargar.

„Gestirnir tóku forskot á sæluna og prófuðu vörurnar sem samanstanda af líkamsskrúbb, andlitsgelmaska, andlitsgelskrúbb og andlitsbrúnkuvatni og við erum himinlifandi með viðbrögðin. Húðvörulínan er 100% þróuð og framleidd á Íslandi og ekki skemmir fyrir að hún er fyrir bæði kyn,“ segir Kristbjörg.

„Íslenska vatnið er í aðalhlutverki í vörunum og lögð er höfuðáhersla á hreineika innihaldsefnanna. Við fórum svo eldnsnemma á flakkið í morgun með vörurnar í verslanir,” segir Kristbjörg, sem hefur í nógu að snúast áður en hún heldur aftur utan til Katar þar sem fjölskyldan er búsett. 

Anna Margrét Árnadóttir tók allar myndir sem fylgja fréttinni.