Hættustig á Vestfjörðum og Norðurlandi vestra sem eystra

Ríkislögreglustjóri hefur ákveðið í samráði við lögreglustjórana á Vestfjörðum, Norðurlandi vestra og Norðurlandi eystra að hækka viðbúnaðarstig vegna óveðurs af óvissustigi yfir á hættustig. Greint er frá þessu í tilkynningu frá Almannavörnum en ákvörðunin er tekin í samráði við Veðurstofu Íslands.

Almannavarnir áttu stöðufund með Veðurstofu Íslands síðdegis þar sem fram kom að veðrið væri ekki búið að ná hámarki. Veðrið væri þó farið að hafa veruleg áhrif á samfélög þessara þriggja lögregluumdæma.

Varðandi Vestfirði er aðallega um að ræða Strandir í takt við rauða viðvörun Veðurstofunnar. Búast má við áframhaldandi óveðri og ófærð auk þess sem er stórstreymt er þessa dagana. Við þessar aðstæður hefur myndast ísing á raflínum með tilfallandi rafmagnsleysi.

„Ef hættumat leiðir í ljós að hætta fer vaxandi verður að grípa til tafarlausra ráðstafana til að tryggja sem best öryggi þeirra sem á svæðinu búa/dvelja,“ segir í tilkynningunni.

Slíkt sé gert með því að efla viðbúnað neyðar- og öryggisþjónustunnar á viðkomandi svæði, ásamt því að grípa til fyrirbyggjandi aðgerða s.s. rýmingar, brottflutnings eða lokunar svæða. Einnig eru leiðbeiningar og viðvaranir einkennandi fyrir þetta stig (almannavarnir.is).

Allar nýjustu upplýsingar af veðrinu má finna í Veðurvaktinni.