Arsenal kastaði frá sér sigrinum gegn Chelsea

Chelsea vann 1-2 endurkomusigur á Arsenal á Emirates í dag. Mörk Chelsea komu á fjögurra mínútna kafla undir lok leiksins.

Þetta var annar leikur Arsenal undir stjórn Mikels Arteta. Liðið hefur aðeins fengið eitt stig út úr þeim.

Arsenal hefur tapað fjórum heimaleikjum í röð sem hefur ekki gerst í 60 ár.

Arsenal var mun sterkari í fyrri hálfleik og leiddi að honum loknum, 1-0. Pierre-Emerick Aubameyang skoraði eftir hornspyrnu á 13. mínútu.

Chelsea sótti í sig veðrið í seinni hálfleik. Á 83. mínútu jafnaði Jorginho með skoti af stuttu færi eftir að Bernd Leno, markvörður Arsenal, greip í tómt.

Jorginho var heppinn að vera inni á vellinum því skömmu áður en hann skoraði átti hann að fá sitt annað gula spjald og þar með rautt eftir brot á Matteo Guendouzi.

Þegar þrjár mínútur voru eftir skoraði Tammy Abraham sigurmark Chelsea eftir vel útfærða skyndisókn.

Chelsea er í 4. sæti ensku úrvalsdeildarinnar en Arsenal í því tólfta.