Finnur kemur í Finns stað hjá Högum

Finnur Oddsson, sem verið hefur forstjóri Origo síðustu sjö ár, hefur verið ráðinn forstjóri Haga. Hann mun hefja störf hjá félaginu í sumar, að því er fram kemur í tilkynningu.

Finnur lauk doktorsprófi í atferlisfræði frá West Virginia University árið 2000 og AMP frá IESE í Barcelona. Haft er eftir Finni í tilkynningu að það séu forréttindi að fá að móta starfsemi og framtíð Haga, „þessa sögufræga forystufyrirtækis í smásölu á Íslandi“.

„Staða Haga er einstaklega góð og það eru spennandi tækifæri framundan. Ég þakka stjórn Haga traustið sem mér er sýnt og hlakka til.“

Finnur fer þannig úr einu Kauphallarfyrirtækinu yfir í annað en nú í kvöld var tilkynnt um starfslok hans hjá Origo. Finnur tekur við starfi forstjóra Haga af nafna sínum, Finni Árnasyni, sem óskaði eftir því að láta af störfum hjá Högum í lok apríl.

Í tilkynningu frá Origo segir að Finnur muni starfa hjá fyrirtækinu til sumars en verði á meðan stjórn til stuðnings og ráðgjafar þar til nýr forstjóri hefur verið ráðinn.

Miklar sviptingar hafa verið í forystu Kauphallarfyrirtækja síðustu daga. Í lok apríl var, eins og áður segir, tilkynnt um starfslok Finns Árnasonar hjá Högum og samhliða því var tilkynnt að Guðmundur Marteinsson, framkvæmdastjóri Bónus, hafi einnig óskað eftir starfslokum eftir nær þriggja áratuga feril innan fyrirtækisins.

Sama dag var svo tilkynnt að Guðmundur Kristjánsson hefði ákveðið að láta af störfum sem forstjóri Brims hf. vegna persónulegra ástæðna.