Boðað til blaðamannafundar um sýnatöku á landamærunum

Svandís Svavarsdóttir heilbrigðisráðherra hefur boðað til blaðamannafundar í Ráðherrabústaðnum klukkan tvö í dag. Meginefni fundarins er framkvæmd sýnatöku á landamærum vegna COVID-19 og viðbúnaður í heilbrigðiskerfinu.

Ásamt heilbrigðisráðherra verða Alma D. Möller landlæknir, Þórólfur Guðnason sóttvarnalæknir, Víðir Reynisson yfirlögregluþjónn hjá Almannavörnum og Óskar Reykdalsson forstjóri Heilsugæslu höfuðborgarsvæðisins til svara.

Sýnt verður frá fundinum í beinni útsendingu á Vísi og Stöð 2 Vísi.