Kelly Clarkson sækir um skilnað

Bandaríska söng- og leikkonan Kelly Clarkson hefur sótt um skilnað við eiginmann sinn, Brandon Blackstock. Frá þessu er greint á vefmiðlinum ET Online.

Í skilnaðarpappírunum sem Clarkson lagði fram segir hún ástæðu skilnaðarins vera ágreiningsmál sem ekki væri unnt að leysa úr. Eins óskaði Clarkson eftir sameiginlegu forræði tveggja barna þeirra hjóna.

Þá krefst Clarkson þess að kaupmála sem gerður var í upphafi hjónabandsins verði framfylgt. Verði raunin sú myndi það þýða að ekki þyrfti að fara í skipti á búi þeirra hjóna, en Clarkson er töluvert auðugri en verðandi fyrrverandi eiginmaður hennar.

Clarkson hefur einnig óskað eftir því að fá löglegu ættarnafni sínu breytt aftur yfir í Clarkson, en hún tók upp nafnið Blackstock við giftingu. Þrátt fyrir það hefur hún áfram verið þekkt undir Clarkson-nafninu og notað það iðulega.

Clarkson og Blackstock gengu í það heilaga árið 2013. Þau eiga saman tvö börn, fimm ára dótturina River og fjögurra ára soninn Remington.