Ráku 10 en vilja ráða 60

Nýir eigendur Borgunar ráku tíu starfsmenn í gær. Í þeirra hópi var Sæmundur Sæmundsson, forstjóri og aðrir stjórnendur. Vísir fékk fjölmargar ábendingar um hreinsun í efstu lögum fyrirtækisins í gær, sem ekki var drepið á í tilkynningunni sem Borgun sendi frá sér um brotthvarf forstjórans, og kallaði eftir nánari upplýsingum.

Samkvæmt svörum Borgunar voru, auk Sæmundar, „örfáir stjórnendur og starfsmenn til viðbótar“ látnir taka pokann sinn. Aðallega hafi verið um að ræða fólk á „þeim sviðum þar sem nýir stjórnendur taka við.“ Hluti þeirra stjórnenda sem áður mynduðu framkvæmdastjórn félagsins verði hins vegar áfram í stjórnendahópnum eftir kaupin. Samanlagt hafi tíu manns verið sagt upp störfum, að Sæmundi meðtöldum.

Eftir breytingarnar starfi 130 manns hjá fyrirtækinu og segjast nýir eigendur Borgunar, Salt Pay Co Ltd., ætla að fjölga starfsfólki á næstunni. Stefnt sé að því að ráða 60 nýja starfsmenn á næstu sex mánuðum.  „Stór hluti nýráðninganna verður úr hópi nýútskrifaðra háskólanema sem fara munu í gegnum sérstaka þjálfun á ýmsum sviðum,“ segir í svari Borgunar.

Haft er eftir Marcos Nunes, nýjum forstjóra Borgunar, að horft verði til ungs fólks á Ísland. „Það er sá hópur sem hefur orðið hvað verst úti í kjölfarið á COVID-19 og þarf nauðsynlega að fá sitt fyrsta tækifæri á vinnumarkaðnum,“ segir Marcos. 

„Við vitum að ungt fólk á Íslandi vill láta til sín taka, láta gott af sér leiða og fá tækifæri til að starfa í alþjóðlegu umhverfi þar sem það getur byggt upp reynslu og öðlast hæfni sem skapar þeim farsælan starfsframa.“