Tveggja göngu­manna leitað á Tré­kyllis­heiði

Björgunarsveitir á Ströndum voru í dag kallaðar út vegna tveggja göngumanna í vanda á Trékyllisheiði. Mennirnir hafa verið á gangi í tvo daga og eru nú staddir nálægt Búrfelli þar sem er mikil þoka og lélegt skyggni. Ekki er talið að mennirnir séu slasaðir en að þeir séu orðnir kaldir og hraktir.

Útkall barst klukkan þrjú í dag vegna mannanna og eru nú fjórir hópar björgunarsveitarfólks komnir á heiðina á jeppum til að leita þeirra. Ekki er vitað hvar mennirnir eru nákvæmlega staddir en björgunarsveitarfólk sem er kunnugt staðháttum telur sig vita hvar þeir eru staddir.