Bryn­hildur Guð­jóns er nýr leik­hús­stjóri Borgar­leik­hússins

Stjórn Borgarleikhússins hefur gengið frá ráðningu Brynhildar Guðjónsdóttur leikstjóra og leikkonu sem hins nýja Borgarleikhússtjóra. Þetta var tilkynnt á starfsmannafundi sem boðað var til klukkan 15 í dag. Samkvæmt heimildum Vísis var vel fagnað þegar starfsmönnum var tilkynnt að Brynhildur hefði orðið fyrir valinu.

Brynhildur hefur meðal annars starfað við Borgarleikhúsið að undanförnu og setti upp rómaðar sýningar svo sem Ríkharð III og Vanja frænda.

Eins og Vísir greindi frá í vikunni þá óskaði Kristín Eysteinsdóttir eftir starfslokum hjá Borgarleikhúsinu einu og hálfu ári áður en hennar leikhússtjóratíð lýkur. Kristín var meðal umsækjenda um starf Þjóðleikhússtjóra en Magnús Geir Þórðarson, fyrrverandi útvarpsstjóri, var ráðinn í starfið. Brynhildur var einnig meðal umsækjenda um þá stöðu. Hún sagði af því tilefni í samtali við blaðamann Vísis:

„Ég er manneskja með mína menntun, framgang í listum, á 48. aldursári og er að hugleiða það alvarlega; hvort ég eigi ekki bara að sækja um þetta starf. Ég er ekki þekkt fyrir að klúðra málum. Ég hef bara sagt þetta í þröngum hópi minna vina. Staðan er laus og tíminn líður. Maður vill veg íslenskrar leiklistar sem mestan og bestan. Um annað snýst það ekki.“

Að sögn Kristínar eru ástæðurnar fyrir þessari ákvörðun sinni að vilja hætta tvær. Annars vegar langar hana að búa til meira andrými og frelsi í lífi sínu og verja meiri tíma með fjölskyldunni. Hins vegar standi hún frammi fyrir einstöku tækifæri til að leikstýra kvikmynd, eitthvað sem hana hafi alltaf dreymt um.

Ráðningarferli nýs Borgarleikhússtjóra hefur staðið yfir undanfarnar vikur. Sjö sóttu um starfið en nöfn umsækjenda verða ekki gerð opinber. Ýmsir hafa verið orðaðir við starfið.

Kristín var ráðin Borgarleikhússtjóri árið 2014 og átti að gegna starfinu þangað til sumarið 2021. Nýr leikhússtjóri átti að byrja að vinna með Kristínu í upphafi árs 2021. Nú liggur fyrir að sú samvinna hefst fyrr.