Litla systir lægðarinnar nálgast óð­fluga úr suð­vestri

Lægðin sem herjaði á Sunnlendinga í gær fikrar sig nú austur fyrir land og mun stjórna veðrinu hjá okkur áfram í dag. Áttin verður norðlæg og allhvass vindur algengur, hvassast um landið norðvestanvert, en stormur í norðvesturfjórðungi landsins fram yfir hádegi.

Í hugleiðingum veðurfræðings Veðurstofunnar segir að með norðanáttinni fylgi snjókoma norðantil, en sunnanlands rofar til ef að líkum lætur. Hiti verður nálægt frostmarki, og vindur 13 til 23 metrar á sekúndu, hvassast um landið norðvestanvert.

„Á morgun er lægðin títtnefnda ekki enn úr sögunni, hún verður þá stödd á djúpunum austnorðaustur af landinu og veldur éljagangi norðantil. Litla systir lægðarinnar nálgast okkur hins vegar óðfluga úr suðvestri á morgun og úrkomubakki frá henni er væntanlegur inná sunnanvert landið með slyddu eða snjókomu. Vesturland virðist ætla að sleppa við úrkomu að mestu. Allur þessi lágþrýstingur viðheldur stífum vindi um mestallt land á morgun.

Það lítur því út fyrir að veðrið ætli áfram að valda ferðalöngum einhverjum töfum og vandræðum, sérílagi þeim sem ætla sér yfir fjallvegi,“ segir í tilkynningunni.

Veðurhorfur á landinu næstu daga

Á föstudag: Norðaustan og austan 13-20 m/s, en 8-13 á austanverðu landinu. Snjókoma eða él á Vestfjörðum og Norðurlandi, en slydda eða snjókoma sunnanlands. Hiti kringum frostmark.

Á laugardag: Norðlæg átt 5-13 og él, en úrkomulítið á Suðurlandi. Frost víða 0 til 5 stig.

Á sunnudag: Suðvestan 8-15 og él, en léttskýjað um landið austanvert. Frost 1 til 6 stig.

Á mánudag: Norðaustanátt og snjókoma um tíma í flestum landshlutum. Frost 0 til 5 stig.

Á þriðjudag og miðvikudag: Norðlæg átt og kalt í veðri. Snjókoma eða él norðantil á landinu, en úrkomulítið sunnanlands.