Biðjast afsökunar á að hafa hent Japönum út af ótta við kórónuveiruna

Þýska félagið RB Leipzig hefur beðið hóp japanskra áhorfenda, sem var hent út af leik liðsins um síðustu helgi, afsökunar.

Starfsfólk á vellinum fékk víst þær leiðbeiningar að fylgjast vel með fólki sem gæti verið að bera veiruna og það leiddi til þess að um 20 manna hópi frá Japan var vísað af vellinum er tíu mínútur voru búnar af leiknum.

„Við verðum að biðjast afsökunar á þessum mistökum. Því miður er mikil óvissa í landinu út af veirunni og það leiddi til þessara mistaka,“ segir meðal annars í yfirlýsingu frá félaginu.

Starfsmenn félagsins hafa síðar hitt hópinn og hefur boðið þeim að mæta frítt á leik síðar og fá þá væntanlega VIP-meðferð.