Ráku eina stærstu fótboltastjörnuna í sögu þjóðarinnar eftir aðeins ellefu leiki

Úrúgvæska knattspyrnugoðsögnin Diego Forlan entist ekki lengi í starfi hjá æskufélagi sínu í Úrúgvæ.

Diego Forlan átti glæsilegan feril sem leikmaður en þjálfaraferill hans er að byrja mjög illa.

Penarol ákvað að reka Diego Forlan úr starfi þjálfara liðsins eftir aðeins ellefu leiki. Diego Forlan er nú 41 árs gamall en hann lagði skóna á hilluna árið 2018.

Diego Forlan kom heim til Úrúgvæ fyrir tímabilið 2015-16 og hjálpaði þá Penarol liðinu að vinna titilinn. Hann endaði síðan ferillinn hjá liði í Indlandi og liði í Hong Kong.

Diego Forlan hóf knattspyrnuferil sinn hjá Penarol ellefu ára gamall en fékk fyrsta tækifærið í meistaraflokki hjá Independiente. Þaðan fór hann síðan til Manchester United og vann meðal annars enska titilinn. Forlan fékk hins vegar mikla gagnrýni á tíma sínum á Old Trafford.

Forlan átti eftir að finna sig best á Spáni með liðum Villarreal og Atlético Madrid en framherjinn spilaði á Spáni frá 2004 til 2011. Hann var kosinn besti leikmaðurinn á HM 2010 í Suður Afríku.

Forlan ætlaði að vera enn einn lærisveinn Sir Alex Ferguson til að reyna fyrir sér sem knattspyrnustjóri. Nú er að sjá hvort fallið í upphafi verið fararheill í framtíðinni.

Diego Forlan stýrði Penarol í aðeins ellefu leikjum en hann hefur engu að síður verið þjálfari liðsins síðan í desember. Liðið vann aðeins fjóra af þessum ellefu leikjum og kórónuveiran sá til þess að leikirnir voru ekki fleiri.

Forlan þakkaði fyrir tækifærið á Twitter og stuðningsmönnum félagsins fyrir stuðninginn. „Ég hef ekki yfir neinu að kvarta. Svona er fótboltinn,“ skrifaði Diego Forlan.