Reyndi að slá strætó­bíl­stjóra með á­fengis­flösku

Lögregla á höfuðborgarsvæðinu handtók um kvöldmatarleytið í gær ofurölvi konu í strætisvagni vegna gruns um líkamsárás og fleira.

Í tilkynningu frá lögreglu segir að konan sé grunuð um að hafa ráðist á vagnstjórann og reynt að slá hann með áfengisflösku. Var hún vistuð fyrir rannsókn máls í fangageymslu lögreglu.

Einnig segir að um hundrað mál séu skráð í dagbók lögreglunnar á höfuðborgarsvæðinu þar sem mikið hafi verið um hávaðatilkynningar. Alls eru nú sjö aðilar vistaðir í fangageymslu fyrir ýmis mál.

Ennfremur eru skráð mörg mál þar sem ökumaður var stöðvaður vegna gruns um akstur undir áhrifum áfengis og/eða fíkniefna.

Þá segir frá því að um klukkan 18 í gærkvöldi hafi verið tilkynnt um innbrot og þjófnað í íbúð í hverfi 110 í Reykjavík. Hafði verið farið inn og stolið verðmætum – sjónvarpi og fleiru.