Miklar breytingar á liði Ís­lands milli leikja | Hvernig verður vörnin?

Það var alltaf ljóst að leikir Íslands gegn Englandi og Belgíu yrðu gífurlega erfiðir. Þegar í ljós kom að liðið yrði án Ragnars Sigurðssonar, Jóhanns Bergs Guðmundssonar, fyrirliðans Arons Einars Gunnarssonar, Gylfa Þórs Sigurðssonar og Alfreð Finnbogasonar varð verkefnið enn þyngra.

Vegna kórónufaraldursins var ákveðið að Hannes Þór Halldórsson og Kári Árnason myndu ekki fara með til Belgíu þar sem þeir þyrftu að fara í sóttkví við heimkomuna og þar með missa af leikjum með liðum sínum, Val og Víking.

Báðir áttu fínan leik gegn Englandi, þá sérstaklega Kári sem pakkaði Harry Kane – einum albesta framherja í heimi – einfaldlega saman. Þó leikurinn hafi tapast 0-1 er ekki hægt að setja út á frammstöðu Kára.

Ekki nóg með það heldur fékk Sverrir Ingi Ingason tvö gul spjöld í leiknum og þar með ljóst að hann er í leikbanni gegn Belgíu. Erik Hamrén, þjálfari íslenska landsliðsins, hefur ekki ákveðið hvort hann kalli annan miðvörð inn í hópinn.

Þá átti Kolbeinn Sigþórsson að byrja leikinn í fremstu víglínu en hann meiddist í upphitun. Í hans stað kom Albert Guðmundsson, leikmaður AZ Alkmaar í Hollandi, og stóð sig með prýði.

Það er því ljóst að allavega fjórar breytingar verða á upphaflegu byrjunarliði Íslands gegn Englandi á Laugardalsvelli og leiknum gegn Belgíu á morgun. En hvernig munu Erik Hamrén og Freyr Alexandersson stilla íslenska liðinu upp?

Í markinu stendur valið á milli Ögmundar Kristinssonar og Rúnars Alex Rúnarssonar. Patrik Sigurður Gunnarsson – markvörður U21 landsliðsins – stóð sig með prýði í 1-0 sigri á Svíum og fer með til Belgíu.

Hinn 31 árs gamli Ögmundur á 15 A-landsleiki að baki og var keyptur til gríska stórliðsins Olympiakos í sumar eftir gott gengi með Larissa sem leikur í grísku úrvalsdeildinni. Rúnar Alex er sem stendur varamarkvörður hjá franska liðinu Dijon og á fimm A-landsleiki að baki.

Ef farið er eftir reynslunni er Ögmundur því líklegri kosturinn.

Það vakti athygli margra að Ísland stillti í rauninni upp fjórum miðvörðum í öftustu línu gegn Englandi. Það gekk mjög vel í þeim leik enda uppspil Englendinga mjög hægt.

Jón Guðni Fjóluson gæti komið inn í miðvörðinn en hann á alls 16 A-landsleiki að baki. Það vakti athygli að hann hefði verið valinn þrátt fyrir að vera án félags þessa stundina. Hins vegar gæti Ari Freyr Skúlason verið leikfær en hann þekkir belgíska boltann inn og út eftir að hafa verið atvinnumaður þar til fjölda ára.

Ef Ari Freyr kæmi inn í byrjunarliðið þá mætti reikna með að Hörður Björgvin yrði færðu í miðvörðinn. Þá væru litlar líkur á að Jón Guðni myndi spila en það þekkist varla að lið spili með tvö örvfætta miðverði.

Annar möguleiki er að Alfons Sampsted, fyrirliði U21 árs landsliðsins, komi inn sem hægri bakvörður og Hjörtur Hermannsson, sem lék í stöðu bakvarðar gegn Englandi, fari inn í miðja vörnina. Þá gæti Hólmar Örn Eyjólfsson einnig komið inn í miðvörðinn en hann hefur alls leikið 14 leiki fyrir íslenska A-landsliðið á samt fjölda leikja fyrir yngri landsliðin.

Það eru því margir möguleikar fyrir leik morgundagsins. Ef breyta á sem minnstu þá koma Hólmar Örn og Jón Guðni inn í miðvörðinn. Ef planið er að fá ferskari og sprækari menn inn í vörnina koma Alfons og Ari Freyr - svo lengi sem hann er leikfær - inn í bakvarðarstöðurnar.

Leikmannahópur Belga er illviðráðanlegur en með svipaðri frammistöðu og gegn Englandi er ljóst að íslenska landsliðið gæti vel náð í úrslit ytra. Belgar, líkt og Englendingar, mæta til leiks með sitt besta lið en mögulega missir Kevin De Bruyne af leiknum þar sem eiginkona hans er ólétt.

Leikur Íslands og Belgíu hefst klukkan 18:45 og er í beinni útsendingu Stöðvar 2 Sport líkt og allir leikir íslenska liðsins í Þjóðadeildinni. Upphitun fyrir leikinn hefst á slaginu 18:00.