Talar fyrir því að Katrín Tanja eigi að vera á Mt. Rushmore CrossFit íþróttarinnar

Það styttist í ofurúrslit heimsleikanna í CrossFit og þar eigum við Íslendingar glæsilegan fulltrúa.

Íslenska CrossFit stjarnan Katrín Tanja Davíðsdóttir hefur þegar búið til glæsilega ferilsskrá í CrossFit íþróttinni en hún er langt frá því að vera hætt. Hún er í hópi þeirra allra bestu í sögu sinnar íþróttar.

Framundan eru ofurúrslit heimsleikanna þar sem Katrín Tanja er ein af fimm bestu CrossFit konum heimsins sem munu keppa um heimsmeistaratitilinn. Katrín Tanja keppir þar við hina áströlsku Tiu-Clair Toomey sem og bandarísku stelpurnar Brooke Wells, Haley Adams og Kari Pearce.

CrossFit síðan Morning Chalk Up er dugleg að hita upp fyrir lokaúrslit heimsleikanna sem fara fram frá 19. til 25. október næstkomandi. Tommy Marquez á Morning Chalk Up ræddi sögulega og núverandi stöðu Katrínar Tönju Davíðsdóttir innan CrossFit íþróttarinnar.

Katrín Tanja Davíðsdóttir varð heimsmeistari í CrossFit 2015 og 2016 og varð í þriðja sætinu árið 2018. Frá og með fyrsta heimsmeistaratitli sínum þá hefur hún alltaf endað meðal þeirra fimm efstu á heimsleikunum. Katrín Tanja varð fjórða í fyrra og í fimmta sæti árið 2017.

Hér fyrir neðan má sjá úttekt Morning Chalk Up á stöðu Katrínar Tönju í sögu CrossFit íþróttarinnar.

„Hún er þegar búin að tryggja sér í sjötta sinn sæti meðal þeirra fimm bestu á heimsleikunum. Katrín Davíðsdóttir hefur nú tækifæri til að bæta við rós í hnappagatið: Fjórða skipti á verðlaunapalli eða þriðja heimsmeistaratitilinn,“ skrifaði Morning Chalk Up á Instagram síðu sína og bætti við:

„Tommy Marquez fer yfir rökstuðninginn fyrir því að Katrin eigi að vera á Mt. Rushmore CrossFit íþróttarinnar.“

Mt. Rushmore eða Rushmore-fjall er fjall í Suður-Dakóta. Í fjallið hefur verið höggvið risavaxið minnismerki, sem sýnir átján metra há andlit fjögurra fyrrum forseta Bandaríkjanna eða þeirra George Washington (1732-1799), Thomas Jefferson (1743-1826), Theodore Roosevelt (1858-1919) og Abraham Lincoln (1809-1865).

Almennt er talað um það í Bandaríkjunum að þegar viðkomandi er kominn í hóp þeirra fjögurra bestu í sögunni á sínu sviði þá er hann kominn í úrvalshópinn á Mt. Rushmore.

„Kannski ættum við ekki að vera svo fljót að afskrifa möguleika hennar á því að vinna annan heimsmeistaratitil. Eftir allt saman þá er hún eini keppandinn sem er eftir í keppninni sem hefur einhvern tímann unnið Tiu í lifandi keppni,“ segir í umfjöllun Morning Chalk Up.

Umfjöllun Morning Chalk Up um Katrínu Tönju Davíðsdóttur er hins vegar læst efni og því er ekki hægt að lesa hana nema að borga aðgang að síðunni.