Þrjú mörk skoruð en einungis eitt fékk að standa er Úlfarnir höfðu betur gegn Leeds

Úlfarnir eru með níu stig eftir fyrstu fimm leikina í enska boltanum eftir 1-0 útisigur á Leeds í síðasta leik 5. umferðarinnar.

Á sjöundu mínútu leiksins kom Patrick Bamford boltanum í netið eftir hornspyrnu en David Coote, dómari leiksins, dæmdi markið af eftir samtal við VARherbergið vegna rangstæðu.

Coote stóð í ströngu einnig um helgina en hann var í VAR-inu er Everton og Liverpool mættust. Mikið var rætt um umdeildar ákvarðanir hans eftir leikinn.

Markalaust í leikhléi en Úlfarnir komu boltanum í netið á 53. mínútu. Það gerði Romain Saiss með þrumuskoti en það mark var einnig dæmt af eftir rangstæðu.

Eina mark leiksins sem fékk að standa gerði Raul Jimenez á 70. mínútu. Skot hans fór af Kalvin Phillips og Illan Meisler átti enga möguleika í markinu. Lokatölur 1-0 sigur Úlfanna.

Úlfarnir eru í sjötta sætinu með níu stig en Leeds er í því tíunda með sjö stig.