„Hryllilega slæmt fyrir okkar landsliðsfólk“

Landsliðsfólk Íslands í körfubolta, sem búsett er hér á landi, leikur í undankeppnum stórmóta í nóvember án þess að hafa getað æft íþrótt sína í drjúgan tíma.

Hertar aðgerðir stjórnvalda, sem taka gildi á miðnætti, fela meðal annars í sér íþróttabann á öllu landinu til 17. nóvember. Það þýðir að landsliðsfólk í körfubolta þarf að búa sig undir komandi leiki með einstaklingsæfingum, utan körfuboltasalarins.

Tólf af þrettán leikmönnum kvennalandsliðsins búa á Íslandi og munu því ekki geta æft fyrir komandi ferð til Krítar, þar sem liðið mætir Slóveníu 12. nóvember og Búlgaríu 15. nóvember, í undankeppni EM. Karlalandsliðið fer til Slóvakíu 21. nóvember.

Það var ákvörðun FIBA, alþjóða körfuboltasambandsins, að landsleikir færu fram í nóvember þrátt fyrir kórónuveirufaraldurinn, og að þeir yrðu í svokölluðum „sóttvarnakúlum“ í ákveðnum löndum. Kvennalandsliðið átti að mæta til Krítar 7. nóvember en þar sem að flug til Lundúna féll niður þarf liðið að ferðast 8. nóvember og treysta á að FIBA sætti sig við það. Það þýðir að liðið fær örfáa daga til æfinga á Krít fyrir leikina.

Geta ekki einu sinni farið í salinn og skotið á körfu

„Þessar fréttir í dag breyta ekki formlegum undirbúningi landsliðsins, en auðvitað er þetta slæmt fyrir stelpurnar því núna geta þær ekkert æft. Þær geta ekki einu sinni farið og skotið á körfu, í rúma viku, í undirbúningi fyrir landsleiki. Þetta er mjög slæmt,“ segir Hannes S. Jónsson, formaður KKÍ.

„Við munum klárlega skoða möguleikann á undanþágum til æfinga, þó að ég sé ekki bjartsýnn á slíkt,“ segir Hannes. Hann fer með kvennalandsliðinu til Krítar og var nýbúinn í fyrsta Covid-prófinu af mörgum sem hópurinn þarf að fara í vegna landsleikjanna, þegar hann ræddi við Vísi.

KKÍ barðist fyrir því að FIBA myndi hætta við landsleikina í nóvember vegna ástandsins, en talaði fyrir daufum eyrum. Það að staða íslensks landsliðsfólks hvað undirbúning varðar sé nú orðin enn verri breytir væntanlega engu þar um.

Karlarnir út eftir enn lengri bið án æfinga

Þó að nokkrir af helstu leikmönnum karlalandsliðs Íslands spili erlendis mun íþróttabannið hér á landi einnig bitna á því liði fyrir ferðina til Slóvakíu 21. nóvember. Ísland mætir þar Lúxemborg og Kósóvó í forkeppni HM.

„Ef reglurnar gilda til 17. nóvember þá geta þeir leikmenn sem spila hér heima nánast ekkert gert fram að ferðinni út. Í karlalandsliðinu eru þó vissulega færri sem spila hér heima en í kvennalandsliðinu,“ segir Hannes sem eins og fyrr segir hyggst kanna möguleikann á undanþágu frá æfingabanni fyrir landsliðin.

Formaðurinn vildi þó ítreka að enginn gerði lítið úr þeirri stöðu sem væri á landinu í baráttunni við kórónuveiruna:

„Veiran er andstæðingurinn, enginn annar, og við verðum óháð öllu öðru að standa saman næstu 2-3 vikurnar svo við fáum eins eðlilegt líf og hægt er eftir 17. nóvember. Það skiptir mestu máli. Að sama skapi er samt hryllilega slæmt fyrir okkar landsliðsfólk að geta ekki komist inn í íþróttahús til að æfa.“

Ljóst er að tíðindi dagsins hafa einnig í för með sér að keppni frestast í íslensku körfuboltadeildunum. Ráðgert hafði verið að hefja keppni þar að nýju um miðjan nóvember en nú er unnið að nýrri áætlun.