Slógu til árið 2010 og velta nú á annan milljarð

„Stofnun Onanoff átti sér stað yfir kaffibolla á Starbucks í Happy Valley í Hong Kong 2010. Upphaflega var hugmyndin að byggja upp vörumerki fyrir eigin þróun og hönnun á aukahlutum fyrir síma og snjalltæki,“ segir Bjarki Viðar Garðarsson, annar stofnanda Onanoff, fyrirtækis sem framleiðir heyrnartól sem eru sérstaklega gerð til að valda ekki heyrnarskaða með hámarksstillingu. Meðstofnandi og, að Bjarka sögn, frumkrafturinn í rekstrinum er Pétur Hannes Ólafsson. 

Á þeim tíma sem fyrirtækið var stofnað voru Bjarki og Pétur báðir búsettir í Hong Kong. 

„Við vorum báðir með ábyrgð á uppbyggingu í Asíu fyrir stór íslensk fyrirtæki þegar við kynntumst. Vorum með svipaðan metnað fyrir því að nýta okkur orkuna og þær einstöku aðstæður sem hafa verið í þessum heimshluta síðustu áratugina. Við þekktumst ekki áður en við fluttumst báðir til Hong Kong en mynduðum snemma sterka vináttu þar,“ segir Bjarki sem nú býr á Akureyri á meðan Pétur er enn í Hong Kong. Á þessu ári stefnir velta Onanoff í 1,3 milljarða og segir Bjarki ekki ólíklegt að hún fari yfir tvo milljarða á næsta ári.

En ævintýrið síðasta áratug hefur verið mikið og margbreytilegt enda héldu þeir félagar um tíma að þeir myndu slá í gegn með framleiðslu á símahulstrum og þráðlausum hátölurum frekar en heyrnartólum fyrir börn.

Onanoff er eitt þeirra fyrirtækja sem stofnað var eftir bankahrun. Hjá fyrirtækinu starfa nú um tuttugu manns, þar af flestir í Hong Kong. Hlutafjárútboð verður haldið á næstu vikum og framundan eru jafnvel hugmyndir um að auka við starfsemina á Íslandi.

Með ferðaþreytt börn á flugvelli

„Það er alltaf extra gefandi að vinna með börnum og barnafólki sem kunna að meta þegar vörur eru hannaðar sérstaklega með þeirra þarfir í huga,“ segir Bjarki en ein helsta vara Onanoff eru BuddyPhones heyrnartól sem ætluð eru börnum.

Hugmyndin að framleiðsu barnaheyrnartóla varð þó til nokkru eftir stofnun fyrirtækisins, segir Bjarki:

Upphafið að þeim kafla var að Kristrún Lind, eiginkona mín hringdi í Pétur þar sem hún var stödd á Charles de Gaulle flugvellinum með tvö ferðaþreytt börn og spurði hann af hverju almennileg heyrnartól fyrir börn væru með öllu ófáanleg. Við skoðuðum málið og sáum fljótt gat í markaðnum,“

Þegar þeir félagar fóru að rýna í tækifærið sáu þeir að enginn framleiðandi virtist hugsa sérstaklega um aldurshópinn 2-13 ára. „Vöruþróun þeirra virtist takmörkuð við að mála fullorðinsheyrnartól í barnalegum litum og lækka verðið,“ segir Bjarki um þau heyrnartól sem þá voru á markaði og ætluð börnum

Þá komust þeir félagar að því að mörg heyrnartól fyrir börn voru seld sem leikföng þar sem stór hluti framleiðslukostnaðar fór í leyfisgjöld til vinsælla vörumerkja eins og til dæmis Disney, á meðan gæði og eiginleikar vörunnar voru látin mæta afgangi.

„Við ákváðum að þróa frá grunni heyrnartól fyrir börn, sem taka mið af notkunarmynstri og meðhöndlun barna, með fídusa sem börn þurfa og kunna að meta. Við lögðum frá upphafi áherslu á að gera örugg, sterk heyrnartól úr ofnæmisfríum efnum. En ekki síst tókum við leiðandi afstöðu gegn heyrnarskaða sem þá þegar var að verða að einu algengasta lýðheilsuvandamáli meðal ungs fólks,“ segir Bjarki og bendir á að heyrnaskaði sé oft vanmetinn af bæði foreldrum og framleiðendum heyrnatóla.

Hugmyndavinna og tilraunir í 4 ár

En það var sem sagt alls ekki svo að framleiðsla og sala á heyrnartólum væri frá upphafi augljós vegferð. Þvert á móti tók það félagana fjögur ár frá fyrsta kaffibollanum að hitta á rétta vöru.

„Pétur er gríðarlega öflugur í vöruþróun og yfirleitt með afar sterka sýn á hvert tækni og notkunasvið eru að þróast, svo það var úr nægum hugmyndum að vinna en úr afar takmörkuðu fjármagni og aðgengi að mörkuðum að spila. 

Má segja að fyrstu árin hafi farið í það að blanda saman aragrúa af litlum mistökum og litlum sigrum. Þó alltaf með mjög skýra sýn á að við vildum byggja upp okkar eigið vörumerki með metnað fyrir bæði hönnun og notagildi,“ segir Bjarki og bætir við: 

Við þróuðum snjallar kapallausnir fyrir síma, hágæða leðurhulstur fyrir síma og tölvur og töluvert púður fór í þróun á svakalega fallegum „skinnum" úr viði og leðri fyrir fartölvur. Allt saman afar fallegar og góðar vörur, en erfitt fyrir svo lítið fyrirtæki að ná upp viðunandi magnsölum áður en ný útgáfa af síma eða spjaldtölvu kom út og lager varð ónýtur.“

Ein hugmyndin reyndist félögunum nokkuð dýrkeypt.

„Við eyddum síðan gríðarlegu orku og miklu fé í þróun á ákaflega metnaðarfullri útfærslu á Bluetooth hátölurum sem hefðu líklega gert okkur afar ríka ef við hefðum verið aðeins fyrr á ferðinni, örlítið fljótari að þróa og koma vörunni á markað og haft fjárhagslegt bolmagn til að þola aðeins fleiri áföll á leiðinni. Hátalaraverkefnið reyndist okkur þungur baggi að bera næstu árin en við stóðum við allar okkar skuldbindingar og lærðum mikið í ferlinu,“ segir Bjarki.

Onanoff hefur byggt sölu smám saman upp í gegnum bæði hefðbundnar dreifileiðir, sölu í gegnum Amazon og með eigin netsölu. Bandaríkin eru stærsti markaðurinn en að sögn Bjarka eru Japan, Kóreu og Mið-Austurlanda einnig mjög spennandi markaðssvæði. Þar segir Bjarki Onanoff nú þegar með sterka markaðshlutdeild.

Við spyrjum Bjarka hvaða ráð hann myndi gefa íslenskum aðilum sem mögulega hefðu áhuga á að framleiða vörur í Kína?

Kínverjar hafa náð afar langt sem framleiðsluland og geta gert allan andskotann. Þar er með ólíkindum hvernig kunnátta og sérhæfing hefur byggst upp á sumum sviðum. En fjarlægðin gerir fjöllin blá og langt til Húsavíkur og það notfæra sér kínverskir framleiðendur eins og aðrir, ef Húsvíkingurinn lætur ekki sjá sig á gólfinu!“ 

segir Bjarki og bætir við að staðkunnátta, tengsl og tök á að veita strangt aðhald séu grundvallaratriði.

„Erum hreinlega asskoti góð“

En hvers vegna datt ykkur yfir höfuð í hug að fara af stað?

„Við bjuggum einfaldlega báðir í Hong Kong þegar hugmyndin fæddist, starfa okkar vegna, en það er svo sem engin tilviljun þar sem Hong Kong hefur lengi þjónað sem þungamiðja viðskipta í Asíu og þar hefur verið afar spennandi að búa og starfa,“ segir Bjarki.

Þegar félagarnir ákváðu að slá til með stofnun fyrirtækis var Pétur að hætta sem forstöðumaður vöruþróunar og innkaupa hjá dreifingaraðila í aukahlutabransanum en Bjarki hélt áfram starfi sem framkvæmdastjóri Promens í Asíu. Þegar Promens var svo selt árið 2015 hætti Bjarki þar til að beina kröftum sínum að Onanoff með Pétri.

„Ég flutti til Íslands 2017 eftir 21 ár erlendis og er með litla einingu á Akureyri sem hefur utanumhald um fjármál, fjármögnun og fjárfestasamskipti. Við erum líka að skoða að færa hluta af vöruþróun og hönnun til Íslands, og jafnvel byggja hér upp e-commerce deild,“ segir Bjarki.

Hann segir mikla þolinmæðisvinnu þurfa til að búa til nýtt vörumerki, sérstaklega þegar fjármagn er takmarkað.

„Þeir sem þekkja til í bransanum trúa því vart að við höfum náð þó þetta langt á því fjármagni sem við höfum tekið inn, en í heildina er utanaðkomandi hlutafé undir 500 milljónum króna,“ segir Bjarki. Í dag er reksturinn farinn að skila hagnaði og nýtt hlutafé verður fyrst og fremst notað til að styðja við vaxtarverkefni.

Pétur og Bjarki ráða yfir tæpum 70% hlutafjár. Einn hluthafi er frá Hong Kong en aðrir eru íslenskir aðilar. Að sögn Bjarka er fyrirtækið við það að hefja fyrsta hlutafjárútboðið sitt fyrir stofnanafjárfesta, og umsjónaraðili í því ferli er Centra Fyrirtækjaráðgjöf.

Covid hefur auðvitað sett smá strik í reikninginn.

„Við höfum náð að vaxa um 80% á árinu en COVID19 ástandið hefur auðvitað þrengt aðeins að starfsupplegginu hjá okkur þar sem að ég hef yfirleitt farið nokkrum sinnum á ári til Hong Kong, við hist á vörusýningum og fundum hér og þar, auk þess sem Pétur hefur komið til Íslands. En þetta gengur og einfaldlega verður að gera það,“ segir Bjarki og bætir við: 

Það liggur ekkert annað fyrir Onanoff en að starfa á nokkrum stöðum í heiminum og við erum hreinlega asskoti góð í því!“