Gummi Tóta um vítið örlagaríka: „Virkilega erfitt augnablik“

„Ég ætla ekki að ljúga neinu um það að þetta hefur verið mjög erfitt ár, á vellinum og auðvitað utan vallar líka,“ segir Guðmundur Þórarinsson, söngvari og leikmaður New York City í bandarísku MLS-deildinni.

Fyrsta tímabili Guðmundar í deildinni lauk með grátlegum hætti en hann bar sig þó vel í viðtali við Ríkharð Óskar Guðnason sem sjá má hér að neðan. Guðmundur tók sjöundu vítaspyrnu New York City í leik gegn Orlando City í úrslitakeppninni um helgina, en hún var varin.

Þar með er reyndar ekki öll sagan sögð því mikið gekk á í vítaspyrnukeppninni, eins og sjá má hér að neðan. Pedro Gallese, markmaður Orlando, fékk nefnilega sitt annað gula spjald og þar með rautt þegar hann virtist hafa tryggt liðinu 4-3 sigur. Ekki má gera skiptingu í miðri vítaspyrnukeppni og því fór útileikmaðurinn Rodrigo Schlegel í markið, og hann náði að verja spyrnu Guðmundar.

„Þetta er auðvitað bara gríðarlega svekkjandi, bæði tímabilið sem heild og að enda þetta svona; taka síðasta vítið og klúðra því. Þetta súmmerar svolítið upp árið,“ segir Guðmundur. Hann var þó ekki sá eini sem ekki nýtti sitt víti því það sama átti við um Maxi Moralez, liðsfélaga hans, og Portúgalann Nani í liði Orlando.

„Svo hljóp hann þangað, blessaður“

„Oftast þegar maður tekur víti er maður búinn að sjá fyrir sér stað þar sem maður ætlar að setja boltann, og minn staður var uppi í hægra horninu. Svo hljóp hann þangað, blessaður. Þetta var virkilega erfitt augnablik, en þetta er partur af ferðalaginu. Þetta gerir mann andskoti sterkan, maður verður að hugsa það þannig,“ Guðmundur.

Þessi 28 ára gamli Selfyssingur kom til New York í byrjun árs eftir gott gengi með Norrköping í sænsku úrvalsdeildinni, þar sem hann var fastamaður í byrjunarliðinu. Hjá New York City er hann í nýju hlutverki sem vinstri bakvörður en byrjaði aðeins sjö leiki á tímabilinu og kom 13 sinnum inn á sem varamaður.

Meistaradeildin og svo tvíefldur til leiks á næsta tímabili

„Þetta tímabil hefur verið erfitt aðlögunarferli fyrir mig og svekkjandi í heild sinni, en það er bara „áfram, gakk“. Þetta er bara fótbolti og það koma alltaf tímabil sem eru upp og niður. Þetta er klárlega eitt af því erfiðara sem að ég hef staðið í fótboltalega, og svo vitum við auðvitað öll hvernig ástandið er í heiminum. Það bætti því aðeins gráu ofan á svart hvernig þetta hefur verið. En þá gildir bara að halda áfram að æfa á fullu og gera sig kláran fyrir Meistaradeild Norður-Ameríku, sem er eftir hjá okkur. Og mæta svo tvíefldur til baka fyrir næsta tímabil,“ segir Guðmundur.

New York City er komið í 8-liða úrslit Meistaradeildarinnar og á þar í höggi við UANL frá Mexíkó, sem er 1-0 yfir í einvíginu. Liðin mætast að nýju í Orlando 16. desember.

Guðmundur segir að þrátt fyrir að hann vilji auðvitað spila meira, og þó að kórónuveirufaraldurinn hafi gert lífið utan vallar erfitt, þá sé hann ánægður með hlutina hjá New York City:

„Mér líður vel. Það er rosalega vel hugsað um mann hérna og umgjörðin er rosalega flott. En aðlögunarferlið hefur verið erfitt. Ég er að spila nýja stöðu, sem ég hef aldrei spilað áður, og hef fengið takmarkaðan spiltíma. En svo er þetta bara ferðalagið í lífinu, hvað sem maður er að gera, að halda í þessa trú sem maður hefur á sjálfum sér. Það hefur verið extra mikilvægt í ár. Að týna ekki eigin sjálfstrausti. Auðvitað er fullt af hlutum sem gætu verið betri fyrir mig persónulega en það er bara áskorun að takast á við það og partur af þessu þroskaferli, að verða betri leikmaður og manneskja, og það er keppni sem ég er til í. En ég ætla ekki að ljúga neinu um það að þetta hefur verið mjög erfitt ár, á vellinum og auðvitað utan vallar líka.“