Segir son sinn afar vinnusaman og hann minni um margt á Jón Rúnar

„Ég veit það ekki. Það verður að koma í ljós. Fer það ekki mikið eftir því hvernig gengur?“ sagði Viðar Halldórsson skellihlæjandi þegar blaðamaður Vísis spurði hann hvernig væri að vera orðinn pabbi landsliðsþjálfara.

Viðar er formaður FH, fyrrverandi leikmaður fótboltaliðs félagsins og íslenska landsliðsins. Og jú, pabbi Arnars Þórs Viðarssonar, nýs þjálfara karlalandsliðsins.

„Hvað á maður að segja? Þetta hefur alltaf verið fótbolti hjá mér og strákunum. Maður er orðinn löggiltur og það má segja að síðustu fimmtíu árin hafi þetta bara verið fótbolti. Upp og niður, bæði gleði og fýla,“ sagði Viðar.

Hann og eiginkona hans, Guðrún Bjarnadóttir, eiga þrjá syni sem allir hafa lagt fótboltann fyrir sig. Arnar er elstur (fæddur 1978) og síðan koma Davíð Þór (fæddur 1984) og Bjarni Þór (fæddur 1988). Þeir léku allir sem atvinnumenn og eiga allir landsleiki á ferilskránni.

„Ég efast ekkert um það að hann mun gera sitt besta. Hann hefur allt til að geta þetta en svo verður að sjá hvernig gengur. En auðvitað verður öðruvísi að horfa á landsleiki, það hlýtur að vera,“ sagði Viðar.

„Ég hef alla tíð verið stoltur af honum og hinum. Arnar hefur „maxað“ sinn feril bæði sem leikmaður og þjálfari með mikilli vinnusemi. Það hefur ekki vantað. Hann var aldrei neinn Messi í fótboltanum en hafði eitthvað annað sem fleytti honum áfram.“

Viðar segir að Arnar minni stundum á bróður hans, Jón Rúnar, sem var lengi formaður knattspyrnudeildar FH.

„Hann er að mörgu leyti líkur föðurbróður sínum, Jóni Rúnari Halldórssyni. Þeir eru ákafir og hella sér í verkefnið og þá er ekkert annað sem kemst að. Hann leggur sig mikið í þetta og vinnusemin er rosaleg,“ sagði Viðar.

En bjóst Viðar við því að sonur hans færi út í þjálfun þegar hann hætti að spila?

„Hann hafði alla tíð allt í það, eða manni fannst það. En ekkert endilega. Ég hefði alveg eins getað séð hann fara í eitthvað annað. En eftir að hann byrjaði var ekkert aftur snúið,“ svaraði Viðar sem var viðloðandi þjálfun á árum áður.

„Það hefur mikið breyst síðan þá og hver hefur sína sýn á þetta. Tæknin er orðin svo mikil. Þessir yngri þjálfarar í dag vinna allt öðruvísi heldur en áður var gert. Synir sínir segja oft við mig: Pabbi, athugaðu að það er komið árið 2020, ekki 1990,“ sagði Viðar að lokum.