Liv ráðin for­stjóri ORF Líf­tækni

Liv Bergþórsdóttir hefur verið ráðin forstjóri ORF Líftækni og tekur við starfinu um næstu mánaðamót. Hún tekur við starfinu af Frosta Ólafssyni sem óskaði fyrr á árinu eftir að láta af störfum.

Í tilkynningu kemur fram að hún gangi til liðs við ORF Líftækni eftir farsælan feril sem stjórnandi í fjarskiptageiranum, nú síðast sem forstjóri Nova.

„Liv leiddi uppbyggingu fjarskiptafyrirtækisins Nova frá stofnun þess árið 2006 fram á mitt ár 2018. Fyrir þann tíma var hún meðal annars framkvæmdastjóri farsímafyrirtækisins Sko, framkvæmdastjóri sölu- og markaðssviðs Og Vodafone og Tals. Undanfarin ár hefur Liv jafnframt setið í stjórnum fjölda fyrirtækja á Íslandi og erlendis. Liv er viðskiptafræðingur frá Háskóla Íslands og hefur lokið AMP námi við IESE Barcelona Business School,“ segir í tilkynningunni.

ORF Líftækni starfar á sviði plöntulíftækni og framleiðir og selur sérvirk prótein sem notuð eru sem innihaldsefni í BIOEFFECT húðvörurnar. Sömuleiðis er unnið að læknisfræðilegum rannsóknum og öðrum þróunarverkefnum.

Hjá ORF Líftækni og dótturfyrirtækjum þess starfa ríflega 70 manns.