Á­fram í gæslu­varð­haldi grunaður um að hafa orðið móður sinni að bana

Karlmaður um þrítugt, sem grunaður er um að hafa orðið móður sinni að bana í heimahúsi í Hafnarfirði í byrjun mánaðarins, hefur verið úrskurðaður í áframhaldandi gæsluvarðhald til 15. maí.

Þetta segir Margeir Sveinsson, aðstoðaryfirlögregluþjónn hjá rannsóknardeild lögreglunnar á höfuðborgarsvæðinu, í samtali við Vísi en fyrst var greint frá á vef Ríkisútvarpsins.

Gæsluvarðhald yfir manninum rann út síðastliðinn föstudag. Héraðsdómur Reykjaness úrskurðaði manninn í fjögurra vikna varðhald á grundvelli almannahagsmuna en aðspurður kveðst Margeir ekki vita til þess að maðurinn hafi kært þann úrskurð til Landsréttar.

Líkt og greint hefur verið frá var lögreglan kölluð að íbúðarhúsi í Hafnarfirði um klukkan hálftvö aðfaranótt 6. apríl.

Kona á sextugsaldri fannst látin í húsinu og voru tveir menn, annar um þrítugt og hinn á sextugsaldri, handteknir. Eldri maðurinn var látinn laus en sá yngri, sonur konunnar, úrskurðaður í gæsluvarðhald. Banamein móður hans er talið vera hnífstunga.

Greint var frá því í kvöldfréttum Stöðvar 2 fyrr í mánuðinum að hinn grunaði eigi við geð- og fíknivanda að stríða. Hann hafði búið hjá móður sinni og stjúpföður um tíma.