„Hélt að þetta yrði miklu stærra og um­fangs­meira“

Ríkisstjórnin metur aðgerðapakka sem hún kynnti í dag uppá sextíu milljarða króna. Komið verður til móts við fyrirtæki sem hætta þurftu starfsemi og minni og meðalstór fyrirtæki geta fengið hagstæð lán með ríkisábyrgð. Þá verður komið til móts við ýmsa hópa fólks sem hafa orðið illa úti í kórónufaraldrinum.

Aðgerðapakkinn var kynntur í Safnahúsinu klukkan fjögur í dag og var honum bætt ofan á fyrri aðgerðapakka ríkisstjórnarinnar sem kynntur var fyrir um mánuði síðan sem heyrði upp á 230 milljarða króna. Bjarni Benediktsson, fjármálaráðherra, sagði að úrræðin hafi reynst vel hingað til en ljóst sé að ekki öllum fyrirtækjum verði bjargað.

Síðustu vikur hafa þingmenn stjórnarandstöðunnar bent á samráðsleysi og síðustu daga hafa margir þeirra lýst yfir vonum að tekin yrðu stór skref með aðgerðapakkanum.

Helga Vala Helgadóttir, þingmaður Samfylkingarinnar, lýsti í dag yfir vonbrigðum en hún telur pakkann ekki nógu yfirgripsmikinn og að stærri skref hefði þurft að taka. „Við höfum smá áhyggjur af því að það er ennþá verið að einblína mikið á fyrirtækin, þó að þau séu auðvitað nauðsynleg og það þurfi að halda uppi atvinnustigi í landinu, þá höfum við óneitanlega áhyggjur af því að það er ekki nóg, að okkar mati, verið að mæta því tekjufalli sem heimilin eru að verða fyrir.“

„Við erum að leggja til hækkun atvinnuleysisbóta og það er mjög mikilvægt,“ bætti hún við.

Þá sagði Sigmundur Davíð Gunnlaugsson, formaður Miðflokksins, að hann hefði viljað sjá fleiri aðgerðir í þágu heimilanna en einnig hefði hann viljað sjá meira fyrir fyrirtækin í landinu. „Það er eitt og annað gott í þessu, hlutir sem hefur verið beðið eftir undanfarnar vikur, og við munum að sjálfsögðu styðja hvert einasta atriði sem horfir til úrbóta. Ég hélt, satt best að segja, að þetta yrði miklu stærra og umfangsmeira.“

„Það er eins og stjórnvöld séu stöðugt í því að bregðast við orðnum hlut og það komi þeim sífellt á óvart hvað þetta hefur mikil áhrif,“ sagði Sigmundur Davíð.

„Mér fannst líka skrítið að sjá fjárhæðina sem er hugsuð fyrir fjölmiðla,“ sagði Helga Vala. „Þingið var jú búið að samþykkja 400 milljónir til fjölmiðla í síðustu fjárlögum og nú tala þau um 350 milljónir. Fjölmiðlar eru gríðarlega mikilvægir núna.“

„Þó að það séu þarna góð atriði eins og með félagsmálin þá eru það atriði sem væri þörf fyrir hvort eð er,“ sagði Sigmundur. „Viðbrögð stjórnvalda þurfa að vera til þess fallin að taka á mestu efnahagskrísu jafnvel aldarinnar og þau þurfa þá að vera umfangsmeiri, almennari og einfaldari en þetta.“