Klóraði nágranna sinn sem bað um minni læti

Lögreglan á höfuðborgarsvæðinu handtók minnst þrjá ofurölvi aðila í tveimur útköllum í nótt. Í fyrra skiptið voru tvær ofurölvi konur handteknar í Hlíðahverfi á ellefta tímanum. Þá hafði önnur þeirra ráðist á nágranna sinn sem hafði bankað upp á og beðið konurnar um að minnka hávaðann. Meðal annars klóraði hún hann.

Hin konan var handtekin fyrir að tálma störf lögreglu við handtöku fyrri konunnar.

Samkvæmt dagbók lögreglunnar var ofurölvi maður svo handtekinn með hjól á Nýbýlavegi um klukkan þrjú í nótt. Hann var grunaður um að hafa stolið hjólinu og var vistaður í fangageymslu.

Á áttunda tímanum í gærkvöldi barst tilkynning um ungan mann sem hafði dottið af mótorhjóli sínu í Mosfellsbæ. Sá var fluttur á sjúkrahús með meiðsl á fæti.

Að öðru leyti voru nokkrir ökumenn stöðvaðir í gækvöldi og í nótt, grunaðir um akstur undir áhrifum fíkniefna eða áfengis. Einn þeirra var ölvaður og án réttinda. Annar ökumaður hafði verið sviptur réttindum og ók á ótryggðum bíl. Þar að auki hafði hann drukkið en áfengismagn í blóði mældist undir refsimörkum.